As man an’n 28. Mai 1831 dat „Allgemeine Gesetz wegen Anordnung von Provinzialständen“ bewilligen dee, wähl man as Versammelnsteed vun de Stänn för Holsteen de Stadt Itzhoe (Itzehoe). Man keek sik vörher de Ruums vun de Hüüs, de dat dorför geev, an. Man keen Gebüüd in Itzhoe weer groot noog för de Stännversammeln. So besloot man recht gau, neven dat Raathuus en Neebo hentostellen. Den Grundsteen dorför legg man denn aver eerst an’n 14. August 1834.

Man bo denn an’n Markt en Gebüüd in de Form vun de Tiet, slicht un ahn veel Farv in’n Sinn vun den laten Klassizismus. Binnen deel man den Ruum so op, dat de holsteenschen Stänn sik dor versammeln kunnen. An den groten Saal in’n eersten Stock, wo man tosamenseet, sloten sik ünner annern twee Stuven an, wo de Utschussen sik drepen kunnen.

In de Tiet vun de Bo diskereer man düchtig doröver, an wat för en Steed jedereen sitten schull. Man schull klook kriegen, woans de Afordneten un dat Präsidium tosamenhüngen.

Wat för en Architekt dat Gebüüd an’t Enn plaant hett, dor hett man lange Tiet över streden. Middewiel meent de mehrsten Lüüd, dat Friedrich Christian Heylmann (de Jüngere) dat Gebüüd plaant hett un nich Christian Frederik Hansen, de domals böverste Bodirekter weer.

Heylmann hett op jeden Fall ok noch as so nöömte Conducteur de Opsicht över den Bo vun dat Stännhuus hatt. Af den 1. Oktober 1835 un as de eerste Stännversammeln för Holsteen in Itzhoe losgüng, bruuk man dat Gebüüd in düsse Funkschoon. De Afordneten kemen dor tosamen vun 1835 bet 1848 un vun 1852 bet 1863, Vundaag bruukt man den Saal för de Sittens vun de Raatsversammeln in Itzhoe.

Text: L.P.

Överdragen in't Plattdüütsche: M.E.