Zum Hauptinhalt springen

Kultur vun’t Erinnern in’n Kreis Steenborg

Wenn man sik dat Rebeet vun’n Kreis Steenborg ankieken deit, denn finnt man meist in jeedeen Gemeende grote oder ok lütte Steenanlagen. Se liggt meisttiets merrn in’t Dörp un dreegt de Naams vun vele Suldaten vun dor, de storven sünd. Düsse Ehrenmalen oder Gedenksteens (Ehrenmale oder Gedenksteine) drückt bet vundaag hen ut, dat man sik an Kriegen un Konflikten besinnt. Ok de Minschen in de Kommunen vun Steenborg hören dorto. An jeedeen Denkmal leggt man an den Volkstruerdag en Kranz daal, düsse Traditschoon leevt un steiht för en Kultur vun’t Erinnern.

Denn neven dat, wo sik en enkelte Person direkt an besinnen deit, snackt man vun dat, wat all beholen hebbt, wat all beleevt hebbt un sik an besinnt. Dat kann en Grupp vun Minschen oder sogor en ganze Sellschop för ümmer den Stempel opdrücken. De Utdruck Kultur vun’t Erinnern kann man dorüm ok so verstahn, dat all Formen vun dat Erinnern an grote histoorsche Saken un an Lüüd ut de Tiet meent sünd. So höört vele Steden vun’t Erinnern so as Bodenkmalen un Denkmalen ut de Archäologie (archäologische Denkmäler) un ok besünner Saken un Personen bet vundaag to dat Leven in’n Kreis Steenborg dorto.

Dat gifft över 70 Gedenksteens un Ehrenmalen för de Doden vun den Eersten Weltkrieg (Erste Weltkrieg) un 80 för den Doden vun den Tweten Weltkrieg (Zweiter Weltkrieg). Un denn höllt man in de enkelten Städer un Gemeenden dat Erinnern an den Düütsch-Franzöösschen Krieg (1870/71) oder an den Sleswig-Holsteenschen Opstand (Schleswig-Holsteinische Erhebung) (1848 bis 1852) waken. Düsse Denkmalen hebbt meisttiets de enkelten Gemeenden sülven stift un na den Eersten Weltkrieg opstellt.

Un denn gifft dat in dat hele Kreisrebeet en poor Bowarken un Objekten, de besünners künstlerischen un histoorschen Weert hebbt un as Kulturdenkmalen vun den sleswig-holsteenschen Denkmalschutz sekert warrt. Dorto höört ünner annern de Backsteenhüüs vun den öllsten Glückstädter Gewarfbedriev Druckerei Augustin, dat Adelspalais Prinzesshoff (Prinzeßhof ) ut dat 16. Johrhunnert in Itzhoe oder dat Ole Raathuus (Alte Rathaus in Wilster) mit dat rieke Profil-Fackwark baven. Ok in Landgemeenden gifft dat Bowarken, de en besünner Bedüden för de Kulturlandschop hebbt, so en Reeg histoorsche Hoffanlagen as in Bahrenfleth, Bredenbarg un Wewelsfleth. Ok Buernhööv vun den Typ Husmannshus, dat is en Form vun dat nedderdüütsche Fackhallenhuus, dat dat so blots in dat Rebeet vun de Wilstermasch gifft, finnt man vundaag noch in Beekmünn, Dammfleth un Nordörp.

En besünner Verantwoorden hett de Sellschop, wenn dat um dat Besinnen an de Tiet vun den Natschonaalsotschalismus (Nationalsozialismus) geiht. Nich blots in de groten Steden vun den Terror as Bergen-Belsen, Buchenwald oder Dachau hett dat NS-Regime de Minschen mit System utrövert, duuknackt maakt un doot maakt. Ok in sleswig-holsteensche Städer un op’t Land hett dat NS-Regime utgrenzt un Terror maakt. Vele Gedenksteden un Oorten to’n Besinnen in’t Bunnsrebeet hoolt dat Gedenken an de Doden vun düsse Tiet waak un föddert de histoorsch-politsche Billen in’t Land.

De eenzige Steed vun en Institutschoon to’n Besinnen an de NS-Tiet in’n Kreis Steenborg is in Itzhoe. De Graffanlaag ut de Bronzetiet (bronzezeitliche Grabanlage) an den Rand vun de Binnenstadt hett dat NS-Regime as so nöömtes Germanengraff (Germanengrab) to Propagandazwecken för sik nahmen. Siet dat Johr 2020 fungeert de Steed as GeSCHICHTENberg Itzhoe, Graffsteden ut de Bronzetiet – Galgenbarg – NS-Propaganda. Hier will man sik in Billens-Arbeit mit de Geschicht nipp un nau befaten.

Text:K.B.

Överdragen in't Plattdüütsche: M.E.