Zum Hauptinhalt springen

De Tiet na den Krieg

In de Johren direkt na dat Enn vun den Tweten Weltkrieg harr man in Sleswig-Holsteen un in den Kreis Steenborg mit de Folgen vun de Krieg un mit vele Krisen to doon. De eerste Landraat in de Tiet na den Krieg woor Adolf Rohde, he weer bet 1933 Börgermeister vun Itzhoe. Tosamen mit de britsche Militärregeren kümmer sik Rohde üm de groten Problemen in’t Kreisrebeet.

Toeerst güng dat hier üm de Problemen mit de Flüchtlingen. Binnen en poor Maanden weer de Inwahnertall in Sleswig-Holsteen vun 1,6 Millionen Minschen op 2,6 anstegen. De Landkreisen müssen de gröttste Last bi dat Opnehmen vun de Flüchtlingen dregen. So müss ok de Kreis Steenborg en grote Tall vun Minschen, de ut de Oostrebeten flücht oder verdreven weren, versorgen un ünnerbringen. De Tall vun Lüüd in’n Kreis wuss vun 91.000 Bewahners vör den Tweten Weltkrieg op meist 161.000 in’t Johr 1946 an. To allereerst bröch man de Flüchtlingen in Privatwahnungen ünner. Enigen müssen aver ok in Baracken oder Nissenhütten provisoorsch ünnerkamen. Nissenhütten, dat weren Wellblickhütten, de man mit deels fardige Delen bo, harrn se harrn en halfrunne Dack un weren 40 Quadratmeters groot. Düsse Hütten stell man in de britsche un in de amerikaansche Zoon för de grote Tall an Minschen ahn Dack över den Kopp op. In Itzhoe geev dat to’n Bispill welk in de Christian-Lohse-Straat. De Alldag vun vele Minschen in’t Kreisrebeet bestünn in de Tiet ut Armoot, Küll, Krankheiten un Hunger. Wiel dat mehr un mehr Lüüd dor weren, harr man nich mehr noog Water. Siet den Anfang vun dat Johr 1945 harr man ümmer mehr Water verbruukt, dat güng meist hen na 100 % mehr.

Vunwegen de slechte Laag müss de britsche Militärregeren mit veel Knööv dorbi gahn, de Verwalten in’t Land wedder in Gang to kriegen. To glieker Tiet schull man de düütsche Sellschop, Justiz un Politik rein kriegen vun allens, wat mit de NS-Tiet to doon harr. De Lüüd, de in de NS-Tiet dorbi weren, schullen rut ut ehr Amt. Düsse beiden Opgaven weren in Sleswig-Holsteen nich licht hentokriegen. Man bruuk Lüüd ut de Verwalten för den Opbo vun dat Land, man müss gegen den Hunger wat doon – de egen Lüüd un de Millionen Flüchtlingen müss man versorgen.

Richtig veel beter woor de Laag eerst denn, as in’n Juni 1948 in de dree Westzonen vun Düütschland de Reform vun dat Geld in de Gang keem un man nu alleen mit de Düütsche Mark betahlen kunn. Un denn kreeg Düütschland in de Tiet ok noch en Barg Hölpsgeller ut de USA, de Marshall-Plaan maak dat mööglich. Dat düütsche Weertschopswunner – dat weer dat gaue Wassen vun de Weertschop denn in de Bunnsrepublik Düütschland – keem in de Gang, dor harr nüms mit rekent.

Text: K.B.

Överdragen in't Plattdüütsche: M.E.

Umkreis

Verwendete Literatur:

Steinburger Jahrbuch 56 (2012).

Rudolf Gieseler, Probleme der Nachkriegsjahre: Itzehoe von 1945–1955, in: Itzehoe. Geschichte einer Stadt in Schleswig-Holstein, 2, hg. von der Stadt Itzehoe, Itzehoe 1991, S. 327–356.

Julian Freche, Der Kreis Steinburg, in: Vom preußischen Erlass zum kommunalpolitischen Zukunftsprojekt. 150 Jahre Kreise in Schleswig-Holstein, hg. von Oliver Auge im Auftrag des Schleswig-Holsteinischen Landkreistages. Kiel 2017, S. 344–364.