As an‘n 8. Oktober 1986 dat Atoomkraftwark in Brokdörp (Brokdorf) an de Elv in Bedriev güng, harrn de Lüüd mehr as teihn Johr mit veel Knööv gegen den Bo demonstreert. Dat Wark kunn 1489 MV leisten, dat stärkste in ganz Düütschland. Bet vundaag gifft dat överall in de Republik Lüüd dorför un ok dorgegen.

In dat Johr 1975 füng man in Brokdörp an mit de Arbeiden an den Bo. Bet dorhen weer dat en ruhige Dörp mit knapp 1.000 Inwahners. Man in ganz korte Tiet gell dat Dörp as en Synonym för Börgers, de sik engageert gegen dat Bruken vun Atoomkraft. Kort nadem man mit de Bo anfungen harr, demonstreren Maten vun de Anti-AKW-Bewegen in’n November 1976 un kregen dat hen, dat de Bo för veer Johr stoppt woor. As dat wedder losgahn schull, verbeed de domalige Landraat vun den Kreis Steenborg dat Demonstreren. Man liekers kemen in’n Februor 1981 meist 100.000 Börgerslüüd in un bi Brokdörp tosamen. 10.000 Politzisten un Polizistinnen drepen op de Demonstranten un Demonstrantinnen, dat geev en Barg Krawallen. Later stell sik rut, dat dat Verbeden nich rechtens weer, man see „Brokdorf-Beschluss“ dorto.

Na de Nuklearkatastrooph in Tschernobyl (fröher Sowjetunion, hüüt Ukraine) geev dat an‘n 7. Juni 1986 noch mehr grote Demonstratschonen, do güngen 100.000 Menschen an vele Steden in Düütschland, ünner annern ok in Brokdörp, op de Straat.

De Bunnsregeren hett beslaten, ut de Atoomkraft uttostiegen. So nimmt man nu ok dat Atoomkraftwark Brokdörp an’n 31. Dezember 2021 vun’t Nett. Wohrschienlich warrt man eerst af 2023 mit den Afbo anfangen – un dat warrt 15 Johr duern.

Text:M.H.

Överdragen in't Plattdüütsche: M.E.