Infrastruktur in‘n Kreis Steenborg

Dat Woort „Infrastruktur“ bedüüdt veel mehr as blots den Verkehr. Man ünnerscheedt twüschen technische un sotschale Infrastrukturen, dorto höört denn t.B. Netten vun Versorgen un Entsorgen un vun Kommunikatschoon, denn Institutschonen bi Polizei un Füerwehr un ok Billens-, Frietiets- un medizinsche Inrichtens. Se funkschoneert all so, dat man mit ehr dat Tosamenleven in de hele Sellschop fasthöllt un dat de Göder in de Weertschop passlich dor henkaamt, wo se hen schüllt. Allens wannelt sik in een Tour, dor kaamt niege Techniken, un wat de Tiet bruukt, mutt ümmer passen. Aktuell is dat to’n Bispill de Klimawannel. De verlangt, dat sik de Infrastrukturen vun vundaag anpasst an dat, wat kümmt.

In vörmoderne Tieden hett man mehrstiets mit dat to doon hatt, wat in en Region vun de Geografie her nödig weer. Dör den Diekbo in de Elvmaschen siet dat 12. Johrhunnert kunnen de Lüüd siedeln, man dorna bruuk man Systemen, um dat Water ut dat Land to kriegen. Eerst denn kunn man op Duer de Landschop nutten. In later Johrhunnerten müss man denn de Anlagen repareren un de Dieken höger un breder maken.

De Infrastruktur vun den Kreis Steenborg mak in’t Middelöller un in de Fröhe Neetiet ok noch Hannel över de Region rut un de Landweertschop ut. As dat mit de Industrie mehr woor, müss man an vele Steden ok mehr maken, um de technische un de sotschale Infrastruktur wieder to bringen.

In den Loop vun dat 19. Johrhunnert nehm de Inwahnertall gau to, de Armoot woor en grote Problem för de Sellschop. Man bruuk notwennig en Armenförsorg un Inrichtens dorför. Ok dat Julienstift, dat 1837 sien Dören as eerstes Itzhoer Krankenhuus opmaak, schull dorbi hölpen. Dat weer ümmer vull utlast, un in de Johren dorna bruuk man mehr medizinsche Versorgen. Na den Tweten Weltkrieg trocken vele Flüchtlingen to. So bruuk man bald en niegen Bo, dat maak man denn twüschen 1972 un 1976 in de Robert-Koch-Straat.

As Kuntrast dorto fohren twüschen Itzhoe un Hamborg af 1840 Dampscheep hen un her un bröchen vele Touristen na Steenborg. Liekers Omnibus- un Bahnverkehr bald de Watertouren afdrängen, bleev de niege Weertschopstwieg in de tokamen Tieden op Duer. In de Mitt vun dat 19. Johrhunnert geev dat ümmer mehr Nieges ut de Technik, so woor dat Leven in de Städer ümmer beter. De niege Versorgen mit Water in Itzhoe to’n Bispill weer positiv för de Füerwehr, de nu nich mehr dat Löschwater ut de Dieken halen müss. Bina to glieker Tiet richt man dat in, dat de Straten Licht kregen dör Gaslampen un man bo Telegrafenkavels.

Denn keem de Twete Weltkrieg, de an vele Steden de Infrastruktur düchtig tweimaken dee. Ok wenn in Itzhoe dat mehrste heel bleev, anners as in Kiel oder Hamborg, so müss doch wat maakt warrn. Veles weer to oolt un müss uttuuscht warrn. Un denn kemen vele Minschen in de Region. Man müss Wahnungen buen, dat Versorgen mit Water müss man moderner maken, de Kanalisatschoon müss utboot warrn, Draht- un Kavelnetten jüst so. Den Noord-Oostsee-Kanal müss man op de Reeg holen, de Bundsautobahn 23 (A 23) bo man wieder ut. Dat weer de Weg bi de Infrastruktur vun den Kreis Steenborg in de Johrteihnten na den Tweten Krieg.

Text: L.P.

Överdragen in't Plattdüütsche: M.E.