Dat Rebeet rundüm Kremp (Krempe) un Wilster is flack un fruchtbor un reckt vun Büttel un Kudensee in’n Noorden bet na Kollmar un Neendörp in’n Süden, also vun den Noord-Oostsee-Kanal bet na de Krückau. De Stöör trennt de twee Steenborger Maschen vunenanner. Över düt besünner Landrebeet hebbt verscheden Lüüd forscht, Forschers mit en groten Naam kaamt vun hier: So schreev Detlef Detlefsen, Direkter vun de Gelehrtenschool in Glückstadt, an‘ Enn vun dat 19. Johrhunnert  veel över de Geschicht vun de holsteenschen Elvmaschen. Goot bekannt is ok de Agrargeograph Thies Hinrich Engelbrecht. Sien Familie köff de Engelbrechtsche Wildnis un geev ehr ok den Naam. He sett sik besünners uteneen mit de natschonale un ok de internatschonale Landweertschop. De Hööv vun de Krempermasch noteer in dat Johr 1929 de Buer un Heimatforscher Johannes Gravert ut Krempdörp. Dat hett man wiederföhrt un ok wat över de Wilstermasch jüst so optekent, un ok in de Tokumst maakt man dor wieder. De Maschbuern weren riek un dorüm ok stolt, dat is en wichtigen Deel, wenn man op de Landweertschopsgebüden kieken deit. Velen staht ünner Denkmalschuul. Man ünnerscheedt twüschen dat Huusmannshuus, dat is en lange Hallenhuus mit en grote Deel in de Mitt un meist Fackwark un dat Barghuus, en Hoff mit en grote Deel an de Siet un den typschen Barg as Lagersteed för dat Hau in de Mitt. Beide Huustypen hebbt traditschonell en smucke Reitdack un binnen in de Stallen för dat Veeh un den Wahndeel. Düsse hett tominnst een gode Stuuv, de meist Holt an de Wannen hett, mitünner sogor Wandfliesen un staatsch utstaffeert is. Mit en Bilegger warrt de Stuuv (Döns) warm maakt. En Bispeel för en  Barghuus ut den Kreis Steenborg steiht in’t  Freelichtmuseum Molfsee: dat Huus ut Arentsee.

Text: J.O.

Överdragen in't Plattdüütsche: M.E.

Bauernkultur Molfsee

3D-Scan in neuem Fenster öffnen