Siet 1878 geev dat in Kellinghusen dat Blatt Stör-Bote, siet üm un bi 40 Johr is dat nich mehr egenstännig – man in Glückstadt, Itzhoe un Wilster gifft dat bet vundaag Daagblääd, de nu den Sleswig-Holsteenschen Zeitugnsverlag (sh:z) tohören doot. Se hebbt all en lange Traditschoon un versorgt dat Kreisrebeet mit aktuelle Informatschonen ut de Region, ut Düütschland un ut de Welt. Al 1740 keem de Glückstädter Fortuna rut, dat öllste Blatt vun’t Bunnsland. Man mutt aver anmarken: Dat geev vörher al, an’t Enn vun dat 17. Johrhunnert, den Altonaischen Mercurius (later Altonaer Mercur). Altona höör domals noch to Holsteen dorto. De Glückstädter Fortuna  verköff man1969 as Lokalblatt, siet 2014 is se wedder en egenstännig Daagblatt. 1817 grünn man dat Itzehoer Wochenblatt, af 1857 kreeg dat den Naam Itzehoer Nachrichten. De harr en Rubrik Der Wirtschaftsfreund, för de weer in de 1850er bet 1870er Johren de Geolog Ludwig Meyn togang. He engageer sik op vele Rebeten.

De NS-Tiet veränner de Itzhoer Medienlandschop: siet 1929 druck man in Itzhoe de Schleswig-Holsteinische Tageszeitung, dat eerste regionale NS-Blatt. Dat övernehm denn 1935 eerst de Itzehoer Nachrichten; 1938 keem de Nordischen Kurier achterna, de man ok al siet 1901 in de Kreisstadt drucken dee. De Allieerten verbaden de Blääd, un so keem dat af 1949 to en niege Ära vun de Daagblääd. Dat niege Blatt kreeg den Naam Norddeutsche Rundschau, dat harr aver de Traditschoon vun de Itzehoer Nachrichten. De Wilstersche Zeitung harr in ehr Geschicht över 130 Johr ümmer ehren Bestand. Se kümmt siet 1890 rut.

Text: J.O.

Överdragen in't Plattdüütsche: M.E.