De drüttgröttste Stadt vun den däänschen Staat is wat Besünners: Se keem tostann, wiel dat de däänsche König dat wull. Christian IV. leet Glückstadt vun 1615 bet 1621 opboen. He wull en Haven mit Verbinnen na de Noordsee un Kopp för en Brüch na Neddersassen hebben. Dat schull ok dat Nett vun Festungen noch beter maken, dat weren do de Steenborg, de Bredenborg un de Festung Kremp. För den König weer de Stadt ok en Symbol för en allerbesten Boplaan – un so see he över ehr: „Dat schall glücken un dat mutt glücken, un denn schall se ok Glückstadt heten!“

De Stadt kunn sik gegen Wallenstein sien Lüüd wehren, un so bo man ehr ut to en Residenz vun den König. De Regerenskanzlei un de hööchsten Landsgerichten richt man hier in. Un denn geev dat Leven in de Stadt dör portugiessche Juden un reformeerte Nedderlanners, de kemen to’n Hanneln in den Haven. Noch vundaag is de Riekdom to sehn: Dat Slott vun Christian IV. hett man 1710 afreten, man dor staht noch vele Hüüs ut de fröhe Neetiet. Dat sünd to’n Bispill de Stadtkark (üm 1618), dat „Zucht- und Tollhaus” vun 1736 un de Gevelhüüs an’n Haven.

De Garnison, de man na den Dörtigjohrigen Krieg opboot harr, hebbt de Gegenslüüd vun Napoleon 1815-16 slepen (Däänmark harr en Bund mit Frankriek). Doch as Sitt vun de Regeren hett man Glcükstadt al 1845 an dat Iesenbahnnett anslaten. De Haven bleev bet 1863 en Anloopsteed för Waalfängers ut Gröönland. Dorna steeg man üm op Heerns. De warrt bet vundaag hen in de Matjesweek in jeedeen Johr vertehrt.

En internatschonale Bedüden kreeg an’n Anfang vun dat 20. Johrhunnert de Druckerie Augustin.De weer Spezialistin för chineessche Schriften, man se druck ok araabsche Tekens un sogor Hierolglyphen.

1942 bo man en Marinelazarett. Nadem Düütschland kapituleert harr, strömen dorüm vele verdreven Lüüd in de Stadt. De wuss mehr un mehr, ok as denn vun 1956 bet 2001 de Bundswehrsuldaten hier statschoneert weren. Vundaag wiest sik Glückstadt as en Lüttstadt mit Charme un histoorsches Utsehn (Kiek ok: Detlefsen-Museum in‘n Brockdorff-Palais).

Text: C.B. Överdragen in't Plattdüütsche: M.E.