In‘n Kreis Steenborg hebbt de fief Städer (Itzhoe, Glückstadt, Kellinghusen, Wilster, Kremp), all söven Ämter un 96 vun 106 Gemeenden en egen Wapen. Vun de 106 Gemeenden höört denn noch 64 en Flagg to. Meist is dat dat Wapen op en Flagg op. Mit Biller un Farven wiest se meisttiets op den Naam, de Laag un/oder wat in de Geschicht vun de Steed besünners wichtig weer, hen. Se maakt op en besünnern Punkt vun de Städer, Oorten oder Gemeenden opmarksam. As Bispill: Agethorst erinnert mit sien Wapen an de Alsensche Drahtseilbahn​​​​​​​ un Besdorf dörch en schrägen Balken, de deelt is, an de Neegde vun de Autobahn A 23.

Wi warrt ok den Betog na Landweertschop, Natur, Waterlööp as de Stöör gewohr un mit de passlichen Farven ok na Holsteen bzw. Sleswig-Holsteen.

Neven düsse Wapen vun den Kreis Steenborg gifft dat noch twee anner Gruppen: Eenmal de söven Kremper-Masch-Dörper, un denn de Wapen, de man nich so as dat in de Heraldik (Wapenkunn) vörsehn is, beschrieven kann: Vun de Gemeenden Bekdörp, Huje, Kleev, Krummendiek, Moorhusen, Oldendörp un Willenschoren.

In de eerste Grupp besinnt man sik op de ole Krempermasch-Fahn un dat Deert dor op, en Swaan, de de Flünken utbreedt un kämpen will. Un denn ünnerscheedt sik al söven Wapen blots in de Farven.

De twete Grupp maakt en Utnahm, denn se höllt sik nich an de Regeln vun de Wapenkunn un höört dorum to de Bildsiegels. So arbeidt de Gemeenden Moorhusen un Kleev nich mit de twee Dimensionen as dat schall. Un de Gemeenden Huje un Willenschoren hebbt to dull na Detail un Natur keken bi ehr Wapen. Beides passt nich, denn en Wapen mutt eenfach un stiliseert ween. Dat liggt doran, dat de britsche Militärrregeren 1946 de Vörslääg so annahmen hett. Keen hett dat prööft, wat de bi Heraldik so passen kann.

Text: L.P.

Överdragen in't Plattdüütsche: M.E.