In dat Johr 1238 kreeg Itzhoe de Stadtrechten. Graf Adolf IV. vun Holsteen wull över de Region rut mehr Städer togang kriegen. En Stadt kunn man beter in den Feern- un Transithannel inbinnen. Man nehm sik en Bispill an Rechten un Verfaten vun Hannelssteden as Hamborg un Lübeek. De Kooplüüd vun Itzhoe müssen ok keen Toll betahlen. Tosamen mit dat Stapelrecht op de Stöör, wat dat siet 1260 geev, keem nu op lange Sicht en Opstiegen vun de Weertschop. De Stadt woor een vun de wichtigsten Hannelssteden in Noordelbien.

De Grundlaag för de Organisatschoon in de Stadt af 1238 weer dat so nöömte Lübische Recht – jüst so as in vele anner Städer in Holsteen, somit nix extra Besünners. Man wegen dat Stadtrecht hüng Itzhoe nich so stark vun den Lannsherrn af. So kunn man sik sülven verwalten, de Börgerslüüd harrn ehr Plichten un Frieheiten – un dat woor in de tokamen Johrhunnerten langsam mehr un mehr. De Vaagt weer blots för dat Spreken vun Recht tostännig, müss de Afgaven kuntrolleren un de Stadt Schuul geven. Toeerst weer he ok Vörsitter vun de Gemeendeversammelns. De Börgerslüüd harrn en Raat, de jüm vertreden dee. Man de dükert mit Naam eerst in en Privileg ut dat Johr 1257 op. Dree Maten staht dor bi de Tügen mit op de List. Man nimmt aver an, dat dat düt Gremium al en poor Johr fröher geven hett. De Kooplüüd kregen al 1238 ehr Privilegien, as dat Stadtrecht in de Gang keem. So hören se seker ok al to de eersten Raatsherren.

Text:L.P.

Överdragen in't Plattdüütsche: M.E.