In Sleswig-Holsteen seggt man to dat 16. Johrhunnert ok de Tiet vun de Rantzaus, besünners wegen twee Lüüd ut de Familie Rantzau. Johann Rantzau (1492-1565) weer in de Grafenfehd 1534-1536, den Börgerkrieg üm de däänsche Kroon, un ok in de Letzte Fehd 1559, as man Dithmarschen ünnerkregen hett, en bedüden Anföhrer bi’t Militär. Denn hett he ok över vele Johren de däänschen Königen Raat geven – un he weer ok Steenborger Amtmann. He sülfst weer boren op de Steenborg (Steinburg), jüst so as later sien Söhn Heinrich (1527-1598).

Heinrich Rantzau woor en bedüden Politiker, Amtmann vun Sebarg (Segeberg) un för meist 40 Johr lang Stattholer vun den König in de Hartogdömer. Op dat Rebeet vun de Kultur kreeg he en ganze Barg beschickt. He schreev en grote Tall an Texten in latiensche Spraak, so hett he ok de Kimbrische Halfinsel (Sleswig-Holsteen un Jütland) beschreven, düsse Schrift gifft dat ok in en düütsche Översetten.

Wichtig to’t Wahnen weer de Rantzaus dat Slott Bredenborg (Breitenburg), dat woor af 1530 na Johanns Ansaag opboot. Al in den Loop vun’t 16. Johrhunnert bo man dat Gebüüd an vele Steden um. So kreeg dat Slott noch ünner Heinrich Rantzau en drütten Flögel un woor noch mehr fastmaakt. De Bredenborg (Breitenburg) weer lang nich de enzige, man de wichtigste Adelssitt vun de Rantzaus un woor in düsse Tiet vun Grund op ümboot un utboot. Jüst as al sien Vadder vör em storv Heinrich 1598 op de Bredenborg (Breitenburg).

In de Tiet vun den Dörtigjohrigen Krieg nehmen 1627 de Truppen vun’n Kaiser un 1643 de sweedschen Truppen de Bredenborg in. Wieldat ok veel plünnert woor, finnt man vundaag Böker ut de Bibliothek vun Heinrich Rantzau an vele Steden in Europa. Man maak dat Slott woll wedder torecht, man de Familie vun de Rantzaus wahn dorna woanners un dat Gebüüd verfull mehr un mehr. Eerst in’t 19. Johrhunnert bo man en nieges Gebüüd na de Oort vun den Historismus. Fief Kilometers wieder na Westen to steiht noch vundaag de Tempel vun Nordoe. Heinrich Rantzau leet em opboen.

Text: F.Z.

Överdragen in't Plattdüütsche: M.E.