De Steenborg (Steinburg) liggt vundaag in dat Rebeet vun de Gemeende Süderau in den Oortsdeel Steenborg. In’t Middelöller weer se wichtig för de Grafens as Steed, vun wo ut se verwalten deen, later för de Hartögen vun Holsteen un Stormarn. Nich toletzt geev se den Kreis den Naam.

In dat Johr 1307 kreeg de Stadt Kremp (Krempe) Privilegien op de Borg, liekers weet man nich, to wat för en Tiet de Borg opboot woor. De Oorkunn dorto hett man wohrschienlich later namaakt. Eerst siet 1320 gifft dat sekere Oorkunnen, man dat kann doch angahn, dat se al länger steiht. Un denn gifft dat welk Naams vun ehr Vöögt ut dat 14. Johrhunnert.

De Steenborg weer en Steed, vun wo ut de Böveren de Krempermasch un de Wilstermasch regeren, un liekers harr man ehr siet dat 14. Johrhunnert veelmals to Pand. As de Borg in’t 15. Johrhunnert de Hamborgers as Pand tohören dee, muss Christian I. en poormal Geld geven, dat de Hamborgers ehr heelmaken kunnen. Worschienlich weer de Borg to de Tiet recht wat twei.

De Steenborg weer blots een vun de velen Borgen in Sleswig un Holsteen, de Christian vör allen de Adelslüüd geev. Wenn een dat Pand nehm, kreeg he en Summ an Geld, wat he dringend bruuk. Dat lehn em de Pandgever ut. Düsse kreeg denn dat Recht, de Borg to bruken, un he kreeg ok dat Geld, wat man in dat Verwaltensrebeet, de Vaagtei, över’t Johr innehm.

Christian I. herrsch domals nich blots in Sleswig un Holsteen, sünnern ok in Däänmark un Norwegen. He wull ok König vun Sweden warrn, dat muss he mit düer Söldnerheren dörsetten. Dorför bruuk he veel Geld. An’n Anfang vun dat 16. Johrhunnert harrn de Bischop vun Lübeck un en poor siede Adelslüüd de Steenborg as Pand.

1544 deel man dat Land twüschen Hartog Christian III., de weer ok König vun Däänmark un Norwegen, un den sien jüngern Bröder Hans un Adolf op. Dordör geev dat dree Andelen mit de Zentralen Sebarg (Christians Andeel), Haderslev (Hans) un Gottorp (Adolf). Borg un Vaagtei Steenborg kemen na den Sebarger Andeel, also den Andeel vun den König.

1555 verlegg man den Sitt vun de Verwalten na Kremp. Dat Amt sülven nööm man twüschendör ok na Kremp. De Steenborg weer wedder düchtig twei. Eerst as man en niegen Tegelbo torecht harr, keem de Verwalten torüch. Bet hen na den Dörtigjohrigen Krieg güng de Bedüden vun de Steenborg för de Verwalten meist verschütt.

För dat Militär weer se in den Dörtigjohrigen Krieg nochmal wichtig, as man de Stadt Kremp belagern dee. Later hett man schiens Bomateriool vun de Borg nahmen un dormit de Kremper Festungsmuern utbetert.

Text: F.Z.

Överdragen in't Plattdüütsche: M.E.