Zum Hauptinhalt springen

De christliche Gloven in de Kreis Steenborg

Üm dat Johr 810 hett man to’n eersten Mal versöcht, op dat Rebeet, wat vundaag de Kreis Steenborg is, de Minschen den christlichen Gloven to bringen. In düsse Tiet siedeln hier Minschen vun den Stamm vun de Sassen, de harrn düssen Gloven nich. De Frankenkönig Karl de Grote (747 oder 748-814) dräng mit sien Strietheer över de Elv. He wull den christlichen Gloven inföhren un ok dat Rebeet för sik hebben. De niege Grenz twüschen Däänmark un dat Frankenriek legg man an de Eider fast. In dat Rebeet twüschen Elv un Eider bu man en Karkenorganisatschoon op. 800 Meter in’n Süüdwesten vun de fränksche Borg Esesfeld keem de Karkenplatz Heiligenstedten mit en hölten Karkenbo hen. Tosamen mit de Karken in Meldörp (Meldorf) un Hamborg (Hamburg) weer dat dat eerste christliche Zentrum in’n Noorden vun de Elv. Ünner Ludwig den Framen (778-840) un sienen Berader Erzbischop Ebo vun Reims (woll 778-851) grünn man üm un bi fief Kilometers in’n Süüdoosten vun Esesfeld üm 822 de so nöömte cella Welanao. Vundaag is dat Münsterdörp (Münsterdorf). Dat weer en Benediktinerklooster, in dat man wohrschienlich den Preester-Nawuss för de Mission in Skandinavien utbillt hett. En poor Johr later bo man in Schenfeld (Schenefeld) noch en Kark. Dor müss man een Dag lang hen na Noorden reisen. De Dänen överfullen dat Rebeet ut den Noorden, de Slawen ut den Oosten, un wiederhen leev de Kultur vun de Heiden. So kunnen de christlichen Gemeenden kuum wieder wassen. In dat Johr 983 weer en Opstand vun de Slawen, de Hamborger Bischopssitt güng twei – un so weer de Mission vörbi.

Eerst 1070 is över Heiligenstedten wedder wat opschreven. Dor stünn, dat de Erzbischop Adalbert vun Bremen (üm 1000-1072) hier en Bischopssitt inrichten wull. Man eerst 1127 füng dat an, dat dat Christendom in dat Rebeet, wat vundaag de Kreis Steenborg (Steinburg) is, op Duer blieven kunn. In düt Johr kreeg de Preester Vizelin (üm 1090-1154), he weer bet denn an dat Bremer Domstift, en Opdrag. He schull in’t Slavenland missioneren, dat is vundaag Oostholsteen. He keem dorbi denn ok in den Ruum vun de Holsten, de in’n Westen leeg. De Chronist vun Vizelin, dat weer Helmold vun Bosau (üm 1120-na 1177) schreev, dat knapp noch Minschen na den christlichen Gloven leven deen.

Eerst ünner Vizelin füng man an, en Karkenorganisatschoon to regeln.

Text: K.H.

Överdragen in't Plattdüütsche: M.E.

Umkreis

Verwendete Literatur

Erich Hoffmann, Schleswig und Holstein zur Zeit des Beginns der christlichen Mission, in: Schleswig-Holsteinische Kirchengeschichte, Bd. 1: Anfänge und Ausbau, Teil 1 (Schleswig-Holsteinische Kirchengeschichte, Reihe 1/26), Neumünster 1986, S. 15–61

Karl-Heinz Gaasch, Die mittelalterliche Pfarrorganisation in Schleswig-Holstein , in: Schleswig-Holsteinische Kirchengeschichte, Bd. 2: Anfänge und Ausbau, Teil 2 (Schleswig-Holsteinische Kirchengeschichte, Reihe 1/27), Neumünster 1978, S. 43– 69.