De Münsterdörper Kaland is en Broderschop, de ehr Maten weren Preesters, kemen ut den Adel un vun de Börgers mit en goden Naam. 1304 boen se en Kapell in Münsterdörp bi Itzhoe. Op den Platz schall eenst mal de cella Welanao stahn hebben. Dat weer en Klooster, wo mal för en Tiet de Hillige Ansgar (801-865) sien Wark daan hett. So is man vermoden. De niege Kapell wieh man den Hilligen Sixtus (3. Johrhunnert). De Naam kümmt dorvun, dat Ansgar Reliquien vun den Hilligen Sixtus hierher bröch. Överlevert weer ok dat Wunner, dat dat Water ut den Soot dicht bi in de Tiet vun Ansgar dör Gottskraft in Wien ümwannelt woor. An veer Daag in’t Johr wies man de Pilgerslüüd de Reliquie in en langen Tog. Man fier Gottsdeensten, un wenn de Pilgers dorbi weren, leet man jüm ehr Sünnen af. An’t Enn harr de Broderschop denn noch en Festeten.

As de Reformatschoon keem, bruuk man den Kaland nich mehr. Man dat Kalandshuus bleev, dor kunn man sik wiederhen versammeln. Af 1544 dreep sik hier eenmal in’t Johr de böverste Verwalten vun de Kark. Hier regel man Fragen un Saken vun de Kark un heel ok de theologisch Prövens vun de Pasters af. Denn weer dor ok noch dat Gerichtsamt, wo man Saken vun Ehlüüd verhanneln dee un wo man oppassen dee, dat in de Gemeenden allens örnlich togüng. De Dekan vun den Kaland harr bet 1867 ok dat Amt as Propst vun Holsteen un harr dorüm de böverste Opsicht över Karkensaken. Bet vundaag gifft dat den Kaland as en Institutschoon vun de Kark. Eenmal in’t Johr kümmt de Kaland tosamen, dat Leid hett den sien Vörsitter, de Präses. Dat gifft Vördrääg över Theologie mit en Festbankett an’t Enn – to düsse Traditschoon laadt man Ehrengäst in: de Äbtissin un den Verbidder vun dat evangeelsche adlige Damenstift in Itzhoe.

Text: K.H.

Överdragen in't Plattdüütsche: M.E.