Um 822/23 hett man de cella Welanao üm un bi fief Kilometers in‘n Süüdoosten vun de Borg Esesfeld grünnt, vundaag is dat Münsterdörp. Bi de cella hannelt sik dat üm en Klooster-Inrichten, wo tominnst söss Mönken na de Regeln vun de Benediktiners leven. Över düsse Inrichten steiht wat in de Biografie vun den Hilligen Ansgar (801-865). Sien Nafolger, de Bremer Bischop Rimbert (üm 830-888) harr de schreven in de Tiet vun 865 bet 876. Dorna grünn Erzbischop Ebo vun Reims ( woll 778-840) de cella, Kaiser Ludwig de Frame (778-840) bröch de Idee op den Weg.

An’t Enn vun dat Johr 822 ünnernehm Ebo – he harr den Opdrag vun de Noordsche Mission – tosamen mit den Bremer Bischop Willerich (unbekannt-837) – en Reis in den Noorden. Se schullen den Dänenherrscher Harald (üm 785-üm 846) döpen. Twoors schaff he dat nich, man he leet in’n Schutz vun de Borganlaag Esesfleth de cella Welanao opbuen. Ebo vun Reims wull missioneren un dorüm deen de cella sachts för de Utbillen vun Missionaren. Man weet aver nix över Leven un Arbeiden vun de Mönken ut de Tiet. Mag ween, dat en Verwandten vun Ebo mit den Naam Gozbert (unbekannt-860 oder 874) hier leven dee. Rimbert meen, dat he sik 832 as Missionsbischop op den Weg na Sweden maak. Dor arbeidt he bet to en Opstand 845 in Birka as Prediger.

Üm 865/870 geev dat de cella nich mehr. Worüm man ehr opgeev, dat weet man nich. Al af dat Johr 834 – Ludwig de Frame kunn politsche Kämp üm de Macht daalslagen – leet he dorna direkt bi de Hammaborg (vundaag Hamborg) en niege Karkenzentrum mit en Bischopsitt opboen. Vun dor ut güng man af denn op noordsche Mission, de harr nu Bischop Ansgar ünner sik. As de Hammaburg 845 vun de noordschen Navers tweimaakt weer, keem dat Karkenzentrum na Bremen. De cella hett dorna sachts knapp noch Stütt ut dat Fränksche Riek kregen. So troken de Mönken sik ok na Bremen torüch.

Text: K.H.

Överdragen in't Plattdüütsche: M.E.