Borg Esesfeld

Ganz in’n Westen vun Itzhoe (Itzehoe), direkt an dat Krüüz vun de Autobahn 23 un de Bunnsstraten 5 un 206, dor liggt en Steed, wo de Archäologen en ole Borg ut dat fröhe Middelöller funnen hebbt. De Borg hett Kaiser Karl de Grote in dat Johr 810 boen laten. Dat weer de eerste fränksche Festungsanlaag in’n Noorden vun de Elv. Blots en poor Johr fröher weren de Sassenkriegen to Enn gahn, de vele Johrteihnten duert harrn. De noordelvschen Siedelrebeten vun de Sassen kemen nu in dat Fränksche Riek. Esesfeld deen af nu as Festung an de Grenz, weer aver to glieker Tiet ok en fränkschen Brüchenkopp un en Middelpunkt vun de Verwalten. Von dor ut kunn man Strukturen för Militär un Verwalten in’t Umland opboen. Nich wiet weg vun Esesfeld drepen dree wichtige Feernverkehrswegen op de Stöör. Över de keem man na Däänmark, Dithmarschen un in den Oosten vun Holsteen un kunn dormit ok de Region kuntrolleren. In de Neegde vun de Borg siedeln sik Institutschonen vun de Kark an, so de Kark in Heiligenstedten oder dat Klooster Welanao bi Münsterdörp (Münsterdorf).

De Anlaag sülven leeg op en Geestsporn in’n Noorden vun de Stöör, vun dor ut kunn man sik goot verdeffenderen. Al in Tieden dorvör weer dor en lütte sassische Borganlaag. De Borg weer üm un bi een Hektar groot un weer en swore Festung. En Wall ut Grassoden, de bet to teihn Meters breet weer un en Reeg vun brede Gravens weren rundüm de Anlaag. De Togang na de Borg güng över Eerbrüchen un en hölten Door. Dat geev Strahlengravens, de lootrecht vun den butersten Graven utgüngen. De schullen Truppen, de angriepen deen, utenanner dwingen. Noch en Graven, de weer över fief Meters breet un twee Meters deep, schott opletzt den helen Geestsporn gegen dat Umland af. In dat Johr 817 kunn man afwehren, dat dat däänsch-slawische Heer angriepen dee. Dor wies sik denn, dat de Borg afwehren kunn un dat de Franken an de eerste Macht in de Region fastholen kunnen.

Text: H.A.

Överdragen in't Plattdüütsche: M.E.