Al in dat Johr 1023 stünn de Borganlaag „praesidium Echeho“ an den Noordbagen vun de Stöörsleuf, de dat do noch geev. Düsse Anlaag geev Schuul för en Siedelsteed an den Rand vun de Geest – mit en Markt un en Kark. De weer den Hilligen Laurentius wieht. 1196 steiht se dat eerste Mal in en Oorkunn, man meent aver, se is al bald na 1100 boot woorn. De Bo weer en eenfache Feldsteenkark mit en Toorn na Westen hen. 1256 kriegt de Zisterzienserinnen de Kark ünner sik un 1286 schenkt man ehr de Kark. Denn kreeg dat Karkenschipp twee Scheep, denn de Karkengemeende un de Nonnen bruken den Platz.

De Kark nehm Geld in vun ehr Land un vun de Pacht, de Lüüd ut de Gemeende stiften deen. Dat allens güng an dat Klooster, dorvun müss man de Preesters betahlen und dorför sorgen, dat de Bo instand bleev. In de Kark geev dat 18 Nevenaltoren, an de lesen Vikaren de Messen för de Seel vun de Stifters. Itzhoer Börgerslüüd, Adelsfamilien un de Landsherren vun de Schauenborgers stiften de Altoren. Se harrn hier ok en Graffsteed. De Graffsteden ünner de Kark vun de Familie Rantzau sünd in en goden Tostand, dor staht noch de Koppersargen mit rieken Smuck.

As de sweedschen Suldaten 1657 op Itzhoe schaten hebbt, güng de Kark twei. Man bo 1716 bet 1718 den Backsteensaalbo mit den Afsluss na dree Sieden in’n Oosten, de vundaag noch steiht. Binnen in bo man en Empoor för de Konventualinnen vun dat Damenstift. En groten Deel vun de Utstatten stamm ut de Tiet direkt nadem de Kark tweischaten woor, so de Snitzaltoor, wo dat Leven vun Christus afbillt is, To glieker Tiet stift man de hölten Kanzel, de Dööp ut Holt un dat Triumphkrüüz. As de Kark nieg opboot woor, kreeg se en Orgel mit den Prospekt, de vundaag noch dor is. De Hamborger Orgelboer Arp Schnittger hett ehr maakt. Se is över de halfrunne Äbtissinenloog. Vun 1894 bet 1896 renoveer man de Kark, dorbi kreeg se den besünnern Helm baven op den Toorn.

Text: K.H.

Överdragen in't Plattdüütsche: M.E.