In’t Johr 1613 stift de Weetfro vun Moritz Rantzau, Barbara Rantzau, en Armenhuus in Itzhoe an’n Holtkamp. In de Oorkunn vun de Stiften stünn de Summ vun 1.500 Mark, dorvun köff se en Huus un leet dat torechtboen, so dat arme Lüüd dor wahnen kunnen. As Ünnerhoolt för de Inrichten geev se en Kapital vun 1.000 Mark. Dat leeg bi den Stadtkämmerer. De Tinsen ut düsse Inlaag kreeg de Inrichten dorto. Een Dag na Wiehnachten kregen de Propst un de öllste Börgermeister jedes Johr de Rekens vörleggt. So kontrolleren se de Finanzen vun de Inrichten.

Dat Huus an‘n Holtkamp bo man för den niegen Zweck üm, för dat Ünnerbringen vun arme, ole un kröpelige Lüüd. In negen enkelte lütte Wahnungen kunnen de, de dat nödig harrn, ahn Kossens leven. Wahnungen, de man jüst nich bruken dee, schullen vermeedt warrn. Dat Geld dorvun nehm man för den Ünnerhoolt vun dat Armenhuus dorto. De Stadt wähl Vörstahers un sett jüm in, se verwalten de Inrichten. De Stadtraat vergeev de Hälft vun de Wahnungen, de anner Hälft vergeev de Familie Rantzau.

Barbara Rantzau harr beslaten, een Deel vun ehr Vermögen för en goden Zweck to stiften, dorüm keem dat to düsse Stiften. In de Oorkunn vun de Stiften heet dat, se wull dat vunwegen ehr christliche Leev un besünner Mitleed mit de Armen.

Dat Huus maken sweedsche Truppen in dat Johr 1657 twei, as de de Oolt- un Niestadt beschaten hebbt, so warrt seggt. Dat gifft keen Paperen mehr, dat dat Huus wedder opboot un wiederhen as Armenhuus bruukt woorn is.

Text: K.H.

Överdragen in't Plattdüütsche: M.E.