To dat St. Gertrudenstift seggt man ok Lübsches Gasthuus. Dat woor vör 1475 grünnt un leeg bet 1841 in de Brede Straat in Itzhoe (Itzehoe). Bet hen na de Reformatschoon bröch man hier arme Pilgerslüüd ünner. De övernachten hier op den Weg vun‘n Noorden na de Pilgerzentren as Aachen, Wilsnack, Santiago de Compostela oder Rom. De Sleswiger Bischop Helrich von der Wisch leet all de Lüüd de Sünnen af, de dat Stift Levensmiddel, Bedden oder anners wat schenken deen, un dat för 40 Daag. De Stiften harr den Naam Patrozinium un weer de Hillige Gertrud wieht, de Schutzhillige för Wannerslüüd. Dat Stift müss sik dör Beddeln över Water holen, dat geev keen Vermögen, vun de de Inrichten harr leven kunnt. Dat Seggen över de Finanzen harr en Spitalmeister, de harr vun den Raat den Opdrag, de hele Verwalten to leiten. To’n Deel warrt he persönlich de Beddelfohrten maakt hebben. För dat Johr 1479 is överlevert, dat en Broder Clawes Vörstaher weer. Albert Krummendiek, de Bischop vun Lübeek (Lübeck) wull utdrücklich, dat he düsse Fohrten maken dee.

Na de Reformatschoon wannel sik dat Pilgerstift to en Armenhuus. Börgers ut de Stadt Itzhoe leten dat Armenhuus ehr Kapital na. Vun de Tinsen dorut kunn man arme Lüüd opnehmen un de ehren Ünnerhoolt betahlen. Dat Gertrudenstift övernehm dormit de Funkschoon vun dat vörige Armenhuus an de St. Jürgen-Kapell. Dat bo man üm in en Olenheim. Mehr un mehr kunn man in’t 17. Johrhunnert dat Kapital vun de Stiften vergröttern. So kunn de Stadt in’t Gertrudenstift 26 Armen ünnerbringen un versorgen.

Text: K.H.

Överdragen in't Plattdüütsche: M.E.