Twüschen Itzhoe un Schenefeld, wat in‘n Noorden dorvun liggt, is dat Dörp Draag (Drage). Man hett in’t 12. Johrhunnert to’n eerstenmal wat opschreven över dat Dörp, wat in den letzten Deel vun’t Middelöller un in de Fröhe Neetiet Adelssitt vun verscheden Familien weer. 1731 köff Markgraf Friedrich Ernst von Brandenburg-Culmbach (1703-1762) dat Goot. De däänsche König harr em as Stattholer mit veel Macht för de Hartogdömer Sleswig un Holsteen insett. Nu resideer de Hohenzoller dor mit sien Ehefru Christine Sophie (1717-1779), se stamm ut dat Huus Braunschweig, un mit den groten Hoffstaat. In de Mitt vun de 1740er Johren wessel man de Anlaag dör en staatschen Neebo ut. Dor warrt vertellt, de harr 99 Stuven. De Markgraf nööm dat Huus later Friedrichsroh. Friedrich Ernst, he weer Ridder vun den Elefantenorden, harr sien Nettwark bi de Adelslüüd. De Architekt Christian Böhme ut Kopenhagen weer as Bomeister mit veel Weten un Plie bi dat Projekt dorbi; un ok noch anner Lüüd mit en goden Naam maken dorbi mit. Bi den Bo nehm man ok Materiol vun dat Tönner Slott, dat man afbraken harr. To glieker Tiet richt man in de Naverskark Hohenass (Hohenaspe) en passliche Loge för em as Patroon in. Dicht bi hett de Wahl-Holsteener ok sien Graffsteed funnen.

1762 storv de Markgraf, man seggt em na, dat he hoge Schullen harr. De Weetfru bleev as Herrin vun dat Slott alleen dor, bet se 1779 ok storv un an de Siet vun ehren Mann to Eer keem. Dat Dörp Wedelsdörp nööm man um in Christinenthal, üm ehr to ehren. 1787 maak man Parzellen ut dat hele Land vun dat Goot, dat Slott reet man af. Vundaag is op dat gröne Land nix mehr to sehn vun dat Slott Friedrichsroh in Draag, dat blots veer Johrteihnten dor stahn hett.

Text:J.O.

Överdragen in't Plattdüütsche: M.E.