Dat Amt Schenfeld is in’n Kreis Steenborg wat Besünners. All Gemeenden in dat Amt hebbt vörher den Kreis oder dat Amt Rendsborg tohöört. De Gemeenden, de to dat Amt Hohenass höört, dat sünd Christinenthal, Hadenfeld, Kaisborstel, Looft, Pöschendörp un Reher, hett man 1967 vun Rendsborg na Steenborg umstüert. De anner Gemeenden ut de Ämter Schenfeld un Wacken kemen 1970 achterna, as man de Rebeetsreform maken dee.

In’t Amt leevt 10.645 Personen op en Flach vun 164,39 Quadratkilometers. Schenfeld is wiederhen ländlich bleven, de gröttsten Gemeenden sünd Schenfeld (2.584 Inwahners), Wacken (1.941) un Vaal (1.230), all annern Gemeenden hebbt weniger as 800 Inwahners. De Verkehrsanbinnen löppt över de Bundsautobahn A23 un de Bundsstraat B431.

Vun de Natur her höört dat Amt to de Heid-Itzhoer-Geest. De grote Bedüden vun de Landweertschop is wiederhen goot to sehn. So is de Struktur vun de Weertschop so, dat een lütte un middelgrote Ünnernehmen hett. Wat Besünners weer de Agethorster Drahtseilbahn, de vun 1908 bet 1977 in Bedriev weer un mit de man Toon över en Streck vun 13,5 Kilometers hen na de Portland-Zementfabrik in Itzhoe transporteert hett. Dat weer de längste Seilbahn in Düütschland. Vundaag kann man blots noch enkelte Resten vun de Seilbahnstütten in de Landschop sehn.

Dat Wacken Open Air Festival finnt in‘t Amt siet 1990 eenmal in’t Johr statt. Dat is en Kultur-Beleevnis vun Heavy-Metal-Musik, wat op de ganze Welt bekannt is. Un dat bedüüdt middewiel veel för de Weertschop in Wacken, dat Ünnernehmen sitt wiederhen in Wacken un organiseert dat Festival vun dor ut. Dat löppt ümmer vun Enn Juli bet Anfang August, 2019 weren 85.000 Besökers dor, 75.000 vun jüm harrn as Gäst betahlt.

Text: J.F.

Överdragen in't Plattdüütsche: M.E.