Dat Amt Kellinghusen hett man to den 01.01.2008 billt ut de Ämter Kellinghusen-Land (ahn de Gemeenden Auufer un Wittenbargen) un Hohenlockstedt. Beide harr man vörher oplööst. Dorto keem denn de Stadt Kellinghusen ,de bet denn ahn Amt weer. Dat hett mit 22.750 Inwahners de mehrsten Lüüd un mit 197,75 Quadratkilometers is dat Flach dat gröttste Amt in’n Kreis Steenborg. De Verwalten sitt in Kellinghusen.

De Stadt is mit 8.133 Inwahners ok de gröötste Siedelsteed in’t Amt, dorna kaamt Hohenlockstedt (6.111), Wrist (2.359) un Brokstedt (2.036).

Dat Amt hett bet vundaag meist blots Landweertschop un lütte Dörper un Siedelsteden. In Kellinghusen un in de grötter Gemeenden gifft dat Gewarfrebeten mit middelgrote Bedrieven. As Deel vun de Metropolregion Hamborg un vunwegen dat Niemünster un Kiel nich so wiet weg sünd, gifft dat en nich so lütten Deel vun Arbeitnehmers, de penneln doot, So is dat överall in den Kreis ok.

Vun de Natur her hett besünners de Naturpark Aukrug en besünner Bedüden. Hier gifft dat Moränen mit vele Knicks, Woold, Heid un Dieken. Wichtig is de Stöör, op ehr dörv man bet na Kellinghusen mit Motorbööt fohren. Geern fohrt de Wannerslüüd un de Watersportlers hierher.

De wichtigste Straat is de Bundsstraat B206, de bi Wrist in den Kreis rinkümmt. In Kellinghusen un Hohenlockstedt geiht se an de Städer vörbi un höllt an de B77 op. Anbunnen an de Bahnstreck Hamborg-Kiel is man in Brokstedt un Wrist. Op de Nevenstreck mit een Spoor vun Wrist na Itzhoe hett man 1975 den Personenverkehr instellt.

Text: J.F.

Överdragen in't Plattdüütsche: M.E.