Dat Amt Itzhoe-Land bill man in dat Johr 1970 ut dat Amt Heiligenstedten un enige Gemeenden vun dat Amt Hohenass. 2008 kemen de Gemeenden Lohbarbek, Schlotfeld, Silzen un Winseldörp dorto, dat Amt Hohenlockstedt harr man oplööst. De Verwalten sitt in de Stadt Itzhoe (Itzehoe). De höört sülven aver nich to dat Amt.

In dat Amtsrebeet leevt in’n Ganzen 10.263 Inwahners op en Flach vun 138,5 Quadratkilometers. So is dat Amt dat veertgröttste in’n Kreis Steenborg. Dat liggt in’n Noorden un in’n Westen vun de Kreisstadt Itzhoe. De gröttsten Dörper sünd Hohenass (1.946 Inwahners), Heiligenstedten (1.487) un Oldendörp (1.088). 

In Heiligenstedten grünn man an’n Anfang vun dat 9. Johrhunnert een vun de öllsten Karken in’n Noorden vun de Elv. De St. Marien-Kark (St.-Marien-Kirche) vun vundaag  stammt aver ut dat 13. Johrhunnert. De Kark harr wohrschienlich en Verbinnen mit de Borg Esesfeld (Burg Esesfeld), de man in Itzhoe boot harr.

Ok in Heiligenstedten steiht dat Slott mit densülvigen Naam. Dat höör bet 1691 de Familie von Ahlefeldt un denn dorna bet 1926 de Familie Blome. Denn höör dat de Allgemeenheit. So as dat vundaag utsüht, hett man dat Gebüüd 1850 in de neegootsche Form överboot. Jüst nu steiht dat Gebüüd leddig un keeneen kann rin. 1994 hett man dat kumplett saneert un in private Hannen geven.

Dat Amt Itzhoe-Land hett veel Landweertschop, man ok Tourismus. Dat liggt neeg bi de Stadt Itzhoe, den zentralen Oort. Un dorüm höört dat Amt ok to de Region Itzhoe – 17 Umlandgemeenden hebbt sik tosamenslaten. Se wüllt den Standoort stütten. Anbunnen an den Verkehr is dat Amt dör en Reeg vun Buslinien un dör de Bundsstraat B5, de löppt bi Heiligenstedten.

Text: J.F.

Överdragen in't Plattdüütsche: M.E.