1889 grünn man op dat Rebeet vun dat Amt Horst-Herzhorn, as dat vundaag heten deit, söss Ämter ((Borsfleth, Herzhorn, Hohenfelde, Horst, Kollmar un Sommerland, dat bet 1948 Süderau heten dee). Na un na sloten sik all tosamen. 1970 weer man denn sowiet, dat Herzhorn (dat weren Herzhorn, Kollmar un Borsfleth) un Horst (Horst, Hohenfelde un Sommerland) twee Ämter weren, de denn siet den 1. Januar 2008 tosamen dat Amt Horst-Herzhorn billen.

Dat Amtsrebeet hett vundaag 174,49 Quadratkilometers, op de 15.936 Inwahners leevt. Dormit hett dat Amt na dat Amt Kellinghusen de mehrsten Inwahners. De groten Dörper sünd Horst (5.731 Inwahners), Kiewittsreeg (2.223), Kollmar (1.676) un Herzhorn (1.127). 

Dat Amtsrebeet geiht um de Stadt Glückstadt rum. Dat is meist blots de Kremper Masch, de liggt twüschen de Krückau un de Stöör un reckt sik langs de Elv. Ok vundaag noch hett dat Amt veel Landweertschop, man ok de Tourismus speelt en wichtige Rull. In Kollmar köönt de Gäst, de dagsöver dor sünd, de Scheep op de Elv bekieken. En Landschopsschutzrebeet gifft dat ok, dat is 54 Hektar groot un heet Hohenfelder-/Bredenborgermoor un is en Hoochmoor.

In‘t Amt leevt vele Pendler na Elmshorn, Glückstadt oder Hamborg. Horst un Kiewittsreeg sünd ünner annern dorum so groot, wiel dat se goot anbunnen sünd. In Horst is en Bahnhoff, de to de Bahnstreck Hamborg-Altona-Kiel höört. Kiwittsreeg is wedderum anbunnen an den Hamborger Verkehrsverbund (HVV). Denn löppt de Maschbahn dör dat Amtsrebeet un höllt in Herzhorn. In’n Noorden vun Horst löppt de Bundsautobahn A23, denn is dor noch de Bundsstraat B5. Beide binnt an den Feernverkehr an.

Text: J.F.

Överdragen in't Plattdüütsche: M.E.