Dat Amt Bredenborg liggt in’n Oosten vun Itzhoe. De negen Gemeenden Bredenbarg, Bredenborg, Kollmoor, Kronsmoor, Moordiek, Moordörp, Münsterdörp, Oelixdörp un Westermoor grünnen dat an’n 1. April 1948. De Verwalten sitt in Bredenborg. Vörher geev dat dat Amtsrebeet Bredenborg vun 1890, dorvör weer dat dat Gootsrebeet Bredenborg. Lägerdörp keem 2003 to dat Amt Bredenborg dorto, 2008 denn noch Auufer un Wittenbargen.

Lägerdörp (2.643 Inwahners), Münsterdörp (1.881), Oelixdörp (1.529) un Bredenborg (1.210) sünd de veer Dörper mit mehr as 1.000 Inwahners in’t Amt Bredenborg. Mit 69,81 Quadratkilometers hett dat Amt dat lüttste Flach un mit 8.623 Inwahners is dat dat tweetlüttste Amt in’n Kreis Steenborg.

Dat Slott Bredenborg (Schloss Breitenburg) in de Gemeende mit densülvigen Naam höört to de Profanbowarken in Sleswig-Holsteen mit en grote Bedüden. In’t 16. un 17. Johrhunnert seet hier de Familie von Rantzau, dat weer een vun de Zentren för Politik un Kultur in’t Land. In’n Loop vun dat 19. Johrhunnert maak man ut dat Festungsgebüüd en Landsitt. Bet vundaag hen wahnt de Familie dor un bruukt de Gebüden, dorüm kaamt Lüüd vun buten dor nich so licht rin.

De Landschop vun dat Amt Bredenborg wiest sik ut dör dat siede Land an de Stöör, dör Wooldrebeten, Wischen  un dör dat Bredenborger Moor. De wichtigste Verkehrsweg is de Bundsautobahn A23. De löppt in’n Süden vun Bredenborg, Münsterdörp un Lägerdörp. In Lägerdörp höllt ok de Maschbahn vun Elmshorn na Westerland (Sylt). Twüschen Bredenborg un Kronsmoor liggt ok de Kriedgroov Saturn. So een gifft dat blots eenmal in Noorddüütschland. 2002 legg man ehr still. In Lägerdörp steiht en Zementwark (Zementwerk) vun de Firma Holcim. De is de wichtigste Arbeitgever in dat Dörp mit ca. 300 Mitarbeiders (2019). In’n Ganzen hett de Weertschop in’t Amt Bredenborg mehr lütte un middelgrote Bedrieven.

Text: J.F.

Överdragen in't Plattdüütsche: M.E.