Dat kümmt veelmals vör, dat man bi dat Ünnersöken vun archäoloogsche Steden Sporen vun ganz ünnerscheedliche Tieden finnt un frieleggt. So is dat ok bi den Krinkbarg in de Gemeende Pöschendörp (Pöschendorf) to sehn. Twee Graffbülten ut de öller Noordsche Bronzetiet billt de Mitt vun düsse Steed. Se stammt üm un bi ut de Mitt vun dat twete Johrdusend vör Christi. Dat sünd de letzten Resten vun en grötter Grupp Graffbülten ut de Bronzetiet, man de hett man al lang afdragen un dat Gelänn för de Landweertschop bruukt. Ok de beiden Bülten, de noch dor sünd, hett man düchtig tweimaakt. So kann man ehr Geschicht nich nipp un nau mehr rutfinnen. Bi dat Utgraven wies sik denn doch, dat de Anlaag över vele Johrhunnerten bruukt woorn is – un man hett ehr en poormal ümboot. De gröttere Graffbült weer noch dreeunhalf Meters hooch un meet 30 Meters eenmal dwars röver. En Stück wieder weg weer en kreisrunne Wall-Graven-Anlaag rundherum. De mehrsten Steden, wo man Minschen to Graff bröcht harr, weren twei. Man kunn blots an verscheden Steden de Graff-Bigaven finnen. Funnen hett man veel, dat wies, dat de Bült nich blots in de Bronzetiet, sünnern ok al in de vörröömsche Iesentiet un in’t fröhe Middelöller as Graffsteed bruukt woorn weer.

Verschedenes, wat ümboot weer, wiest, dat de Steed ok noch för wat anners bruukt woor, dat lett sik aver nich ahn Twiefels nawiesen. Besünners bekannt is, dat man vele Geldstücken ut dat fröhe Middelöller, 8. un 9. Johrhunnert, in den Krinkbarg funnen hett. De Geldstücken stammt ut enkelte Graffsteden, man de gröttste Deel vun jüm is as en Depot in en Pott ingraavt woorn. De dicht an 100 sülvern Geldstücken sünd meist all Denaren ut de Tiet vun Karl den Groten. Präägt hett man ehr in den freeschen Hannelsplatz Dorestad. En poor noordsche Geldstücken, de man de Originalen nammakt hett, sünd ok dorbi. Op de een Siet kriggt man en wichtigen Inblick in de Weertschops-Verbinnen, de över de Region rutgüngen – un de Kuntakten vun de Minschen in de Region. Op de anner Siet sünd se wichtige Tüügnissen vun Politik un Sotschales. Noch vundaag sünd twee vun de Geldstücken op dat Wapen vun de Gemeende Pöschendörp afbillt. Dor steiht CAROLVS un DORSTAD op.

Text: H.A.

Överdragen in't Plattdüütsche: M.E.