Buten vör de Stadt, direkt achter den Diek an de Stöör, leeg dat Zementwark in Itzhoe. Man legg dat 1982 still, vundaag gifft dat blots noch en poor Gebüden dorvun. Un dat gifft noch Alsenskamp, wat do de Arbeiderkolonie weer. In dat Johr 1862 kreeg de Jungünnernehmer Gustav Ludwig Alsen vun ganz baven Verlööf – he dorv in dat Zementgewarv instiegen. Bet dorhen weer de britsche Konkurrenz ganz stark un man wüss noch nich, wat dor hier op lange Sicht wat vun warrn kunn. Al een Johr later müss sien Vadder Otto Friedrich Alsen den Bedriev redden, dormit dat keen Konkurs geev. Man denn güng dat doch recht flott, dat man ut de Alsen’sche Portland-Cement-Fabrik en groten Konzern maken kunn. Düchtige Lüüd so as de Koopmann Heinrich Wessel kregen dat torecht, he weer twüschen 1866 un 1904 Direkter vun de Firma. De Infrastruktur müss man opboen, wichtig weer, dat de Firma bi Water un Land anbunnen weer. Man bo grote Brennavens, vun de man wiethen de Schosteens sehn kunn. 1879 maak de Fabrik nevenan in Lägerdörp (Lägerdorf) en Nevenstell op. Dor in de Kriedgrovens bo man den Kalk af, den man för de Produkschoon bruken dee, un bröch em mit Scheep över den Bredenborger Kanal na Itzhoe. Wat man noch bruken dee, weer Tooneer. Alsen hören verscheden Toonkuhlen to. Twüschen 1908 un 1977 geev dat en Drahtseelbahn, de weer mehr as twölf Kilometers lang un güng vun Agethorst över de Dörper Mehlbek, Kaaks, Huje, Oldendörp un Heiligenstedten bet na de Fabrik in Itzhoe. In de Kreisstadt hett man na 120 Johr de Produkschoon vun den Zement, de vun dor in de hele Welt güng, instellt. Man de Bedriev in Lägerdörp höört siet 2003 to de Holcim (Düütschland) AG. De sitt in Hamborg un hett bunnswiet Zementwarken in de Gang.

Text: J.O.

Överdragen in't Plattdüütsche: M.E.