De Keramikmanufaktur Kupfermühle (KMK) in Hohenlockstedt grünnen 1948 in en ole Hall vun de Munitschoonsanstalt Lockstedter Lager de Koopmann Walter Nawothnig un de Keramiker Siegfried Möller. In dat Johr 1950 keem dat Service „Siena“ vun Siegfried Möller op den Markt, dat man in söss verscheden Pastelltöön produzeer un dat denn de eerste Kassenslager woor.

In dat Johr 1960 kunn Peter Nawothnig, de de KMK vun sienen Vadder övernahmen harr, dat Grundstück un de ole Munitschoonshall in de Gleiwitzer Straat kopen. In de Johrteihnten dorna kemen mehr un mehr Gebüden dorto, man fraag düchtig na de Keramik na. De 1970er Johren weren denn de besten in de Geschicht vun de Firma. Den Grundsteen dorför legg dat Service „Viola“ (1968), dat man dörtig Johr lang produzeert hett.

In de Manufaktur maak man Servicen för Tee, Kaffe un Spiesen jüst so as Serien för de Köök un Geschenkdelen. De Andeel an de Produkschoon weer bi all dat je en Drüttel. Geern müchen de Lüüd smucke Wandtellers mit naive Malerie, to’n Bispill mit Motiven ut de Region.

De hoge Qualität vun de Keramikmasse, dat Malen un Brennen mit veel Opwand un goden Weert un denn noch de modernen Designs (to’n Bispill de Serien „Mora“ un „Gerona“), wegen all dat harr de Woor op den Geschirrmarkt en hogen Pries. Man langsam güng dat bargdaal bi de KMK. Billige Massenwoor vun’t Butenland keem un dräng de gode Qualitätswoor vun hier vun den Markt weg.

In dat Johr 1991 övernehm Ernst-Peter Nawothnig vun sienen Vadder Peter dat Geschäft. De niegen Kökenserien „Luna Park“ un „Castello“ mit ehr bunten un fröhlichen Designs müchen de Lüüd in de Tiet geern lieden. Liekers kunn man dat nich mehr opholen, dat de Keramik- un Porzellanindustrie in Düütschland bargdaal güng. Vele Ladens, in de man de KMK-Produkten kopen kunn, müssen dichtmaken. Dormit kunn dat Ünnernehmen blots noch dat Halve ümsetten, so müss de KMK an’n 6. April 1998 den Konkursandrag stellen.

Text: M.H.

Överdragen in't Plattdüütsche: M.E.