Al in dat Johr 1632, blots en poor Johr nadem Christian IV. de Stadt Glückstadt grünnt harr, grünn man Am Fleth de eerste königlich Bookdruckerie. In dat Johr 1775 övernehm Jakob Johann Augustin de Druckerie, do füng de Ära vun dat Ünnernehmen J.J. Augustin an. Dat bleev meist dreehunnert Johr in en Tour bestahn. Ehr grote Tiet beleev de Druckerie an den Anfang vun dat 20. Johrhunnert, as Heinrich Wilhelm Augustin (*1878-†1938), Drucker in de middewiel föffte Generatschoon, af 1905 den Bedriev föhren dee. He entscheed sik, den Druck un den Satz in frömde Spraken grötter to maken, dorbi weren Chineessch, Armeensch, Pehlewi, man ok Sanskrit, Runen oder Kielschrift. De Grünnen, worüm he den Frömsprakensatz utboen wull, weren de: Man harr dat Düütsche Riek grünnt un möh sik nu, mit anner Kolonialmächt liekop to kamen. Augustin haap, dat he Opdrääg vun dat Hamburger Kolonialinstitut kreeg, un dat klapp denn ok. So wuss de Bookdruckerie ümmer mehr, vun söss Arbeiders in’t Johr 1903 bet hen na 120 Setters un Druckers in’t Johr 1945. Man bo an bi dat Gebüüd Am Fleth un harr denn Platz för mehr Technik för’t Drucken.

Mit den Johren kemen ok Opdrääg ut dat Butenland dorto; so kreeg de Druckerie in Glückstadt 1938 vun dat engelsche Königshuus den Opdrag, en Text för den Bildband Krönung des Vizekönigs von Indien in indisch Schrift to setten. Dorto kemen en ganze Reeg vun Tietschriften ut de Wetenschop, dorbi ok de Tietschrift vun de Deutsche Morgenländische Gesellschaft (bet 1992). An’n 30.08.1938 storv Heinrich Wilhelm Augustin na en Unfall, sien Ehfro Hedwig Augustin övernehm dorna de Druckerie. As de Fotosatz opkeem un dorna dat „Desktop-Publishing“ siet de 1970er Johren, verloor de ole Druckerie ehr Bedüden. Man wannel ehr 1977 in en GmbH üm, richt denn en Opfangsellschop in un moderniseer ehr twüschen 1978 un 1982, 2014 hett man den Dregervereen Zeichen der Welt grünnt. De sett sik dorför in, dat de originale Drucktechnik, de meist noch dor is, un ok dat histoorsche Gebüüd blieven kann.

Text: S.P.

Överdragen in't Plattdüütsche: M.E.