Anfangen dee dat mit Wacken Open Air mit de Steenborger Metal-Szeen in de laten 1980er Johren. Thomas Jensen weer Bassist in en lokale Band, he un Metal-DJ Holger Hübner harrn 1989 de Idee to en Festival för Frünnen vun harde Rockmusik. An’n 24. un 25. August 1990 güng dat los: 800 Metal-Fans versammeln sik in de „Kuhl“ an den Rand vun Wacken. Söss Bands, de mehrsten ut de Region, sorgen op en eenzig Bühn för Musik. Al af 1992 geiht dat in de Richt vun en grote Veranstalten: Sponsoring, Bühnentechnik as bi de Profis un en twete Bühn hören nu dorto. In de Johren twüschen 1993 un 1998 harr man Kummer mit de Finanzen un ok mit de privaten Situatschonen. Schullen un verscheden Menen mit de Partners, de man bi de Geschäften in’t Boot harr, harrn dat Festival meist dat Licht utpuust. Man liekers woor ut dat Wacken Open Air af 1997 doch noch en internatschonale Grootveranstalten. Intwüschen kemen 10.000 Besökers, dorüm verlager man dat Gelänn vun de „Kuhl“ op de Wischen op de anner Siet, dorto keem en drütte Bühn.

1998 fiern 20.000 Metal-Fans ehr Stars. De sungen un spelen op verscheden Oort un Wies middewiel op veer Bühnen Metal- un Rockmusik. Siet 1999 güng dat ümer mehr bargop. Dat Festival is to dat tietwies gröttste Heavy-Metal-Festival op de Welt ranwussen – un dat is ok de gröttste Veranstalten in’n Kreis Steenborg. Siet 2007 is dat Wacken Open Air in jeedeen Johr al vörweg utverköfft – 75.000 Lüüd, de betahlt, ströömt denn rin. Middewiel gifft dat acht Bühnen för meist 200 Bands (Tall vun 2019). Dat Gelänn is mehr as 240 Hektar groot, Delen vun de Navergemeenden Gribbohm, Holstenniendorf un Bokelrehm höört dormit to. 2020 müss man dat Wacken Open Air vunwegen de Corona-Pandemie to’n eerstenmal afseggen.

1999 hett man de ICS Festival Service GmbH grünnt, de organiseert dat Festival. En Team mit üm un bi 50 Lüüd, de op Duer anstellt sünd, arbeidt dorför. In de Festival-Saison kaamt noch ca. 3.500 Hölpslüüd dorto – ICS is denn för en korte Tiet de gröttste Arbeidgever in den Kreis Steenborg. Neven dat Wacken Open Air un Metal-Kunzerten höört noch anner Veranstaltens, dat Vermarkten un dat Verkopen vun de Tickets to de Firma dorto. 2017 kunn de Firma 25 Millionen Euro ümsetten. Siet 2019 höört ICS to dat Veranstaltens-Nettwark ut de USA, Superstruct Entertainment, wat op de ganze Welt togang is.

Dat Dörp Wacken mit sien 1.900 Inwahners is fast in dat Festival-Drieven inboot. Dat eerste Kunzert speelt de Musiktog vun de Friewillige Füerwehr. All Lüüd, de dicht bi wahnt, köönt an enige Daag frie op dat Gelänn. De Geschäften nehmt gewaltig wat mehr in in de Festivaltiet. Ok wenn de grote Verkehr, de Larm un de Müll dat Dörp belasten doot, so hett dat liekers finanziell groten Profit un warrt ok na buten hen düchtig wohrnahmen. Lüüd ut Itzhoe antert geern, wenn welk fraagt: „Wo kaamt Se her?“ un de annern dat nich insorteren köönt, „dat is dicht bi Wacken“. Anners as de Naam vun de Kreisstadt kennt meist jeedeen Wacken.

Text: V.V.

Överdragen in't Plattdüütsche: M.E.