Dat Amt Wilstermasch bill man 1970 ut de Ämter Sankt Margrethen, Wewelsfleth un Wilster-Land, dat sitt in Wilster. Dat Amt övernimmt dorto siet Juli 2005 de Verwaltensgeschäften för Wilster. De Stadt höört aver nich to dat  Amt Wilstermasch dorto.

Wilstermasch is mit 6.481 Inwahners dat Amt mit de wenigsten Inwahners in‘n Kreis Steenborg, vun’t Flach her höört dat mit 178,48 Quadratkilometers aver to de grötteren. Vun de 14 Dörper hett blots Wewelsfleth mehr as 1.000 Inwahners (1.308), denn kaamt Brokdörp (965), Beidenfleth (838) un Sankt Margrethen (816).

De Wilstermasch is en Maschrebeet an de Elv twüschen Stöör un Noord-Oostsee-Kanal, dat sünd de Grenzen vun den Naturruum vun dat Amtsrebeet. An de Münnen vun de Stöör liggt dat Stöörsparrwark. Dat bo man 1971 bet 1975 as Schutz gegen de Stormfloten. Över dat Bowark löppt de Bundsstraat B431, de verbinnt de Wilstermasch un de Krempermasch mitenanner. Bi Neendörp-Sassenbann liggt de deepste Steed vun Düütschland bi 3,54 Meters ünner Normalnull. De Buckwindmöhl (Bockwindmühle) in Honigfleth is vundaag ehr Wohrteken. Se schull fröher mal dat Water ut dat Land trecken. Mehr as 350 Exemploren geev dat domals in de Masch.

Vun de Weertschop her hett düt Rebeet veel Veeh, besünners veel tücht man de Rootbunten. Över de Region rut bekannt is dat Atomkraftwark in Brokdörp (Kernkraftwerk Brokdorf). Teihndusende vun Minschen hebbt mehr as teihn Johr gegen den Bo demonstreert. Dat Wark güng 1986 in Bedriev, op’t laatste geiht dat an’n 31. Dezember 2021 vunwegen dat Utstiegen ut de Atomkraft vun‘t Nett.

Text: J.F.

Överdragen in't Plattdüütsche: M.E.