Bet dat de Minsch de Motoren utfunnen hett, weren Windmöhlen tosamen mit Watermöhlen, de man dör Water andreven hett, de Maschinen mit de mehrste Kraft. Man kunn ehr för ganz veel bruken: As Mahl- un Öölmöhlen, üm Holt, Kopper un anner Warkstoffen to verarbeiden un as Schöpp- oder Pumpwarken. De klasssche Windmöhl mit rechteckige lange Flögels stünn in Sleswig-Holsteen eens an vele Steden. Keen anner Oort vun Denkmal in’n Kreis Steenborg is aver in de verleden hunnert Johr so torüchgahn as de Möhlen. De Windkraftanlagen vun vundaag sünd de Nafolgers vun de Windmöhlen.

De Windmöhl „Hoffnung“ in Beidenfleth weer de letzte Diekmöhl, de noch stünn. Fröher geev dat en grote Tall dorvun in de Elvmaschen. To’n eerstenmal snackt man 1740 vun en Möhl. 1749 weer dat en Bockmöhl, de man um 1837 to en groten Galeriehollänner ümboot hett. Bet 1966 hett man de Möhl bedreven, dorvun üm un bi 60 Johr lang vun de Möllerfamilie Sierth. 1966 bet 1970 hett man Diverses ünnernahmen, üm ehr to bewohren. 1971 stell man de Möhl ünner Denkmalschutz. Nadem de Möhl verscheden Lüüd höört harr, keem se an’n 9.11.1989 ünner’n Hamer. In de 2010er Johren stell man swore Schadens an de Bo fast. An’n 17.04.2016 brenn de Möhl af, keeneen wüss worüm. Dormit güng ehr dat jüst so as de Eerwallhollännermöhl mit Windroos vun Kollmar, vun de man 1692 dat eerste Mal wüss un de 2003 kumplett daalbrennen dee.

In Stördörp-Honigfleth steiht en Kokermöhl. De bruuk man, üm dat Water ut de Maschregion achter den Diek ruttokriegen. Dorvun geev dat fröher en grote Tall. Se steiht nich mehr dor, wo se eerst stahn hett. 1959/60 hett de Kreis Steenborg ehr verleggt, üm ehr to holen. Se is de letzte Kokermöhl an de Ünnerelv, de dat noch gifft un de eenzige in Düütschland, de ümmer noch so as fröher as en Schöppmöhl funkschoneert. Siet 1997 kümmert sik de Fördervereen „Bockmühle Honigfleth e.V.“ dorüm, dat se blieven kann. Wenn de Segeln sett sünd, kann se Water in de Honigflether Wettern pumpen.

Noch en histoorsche Windmöhl mit den Naam „Aurora“ steiht in Wilster-Rumfleth. Se is de eenzige Windmöhl in‘n Kreis Steenborg, de noch in Bedriev is. Boot hett man ehr 1872, doch man weet, dat al in dat Johr 1534 en Möhl in Rumfleth bedreven woor. Twee Vörgängers vun düsse Möhl brennen 1840 un 1871 af. 1953 stell man den Windbedriev in. Nadem man de Möhl kumplett restaureert hett, funkschoneert se siet 1996 wedder. Siet 2008 bedrifft en Vereen de Möhl. In datsülvige Johr storv Hansdelf Martens, de letzte Möller vun Professchoon in Rumfleth.

Text: O.A.

Överdragen in't Plattdüütsche: M.E.