Dat Amt Krempermasch keem tostann in dat Johr 1969. Do sloten sik de Stadt Kremp (Krempe) un dat Amt Kremperheid tosamen. In Kremp  seet denn dorna ok de Verwalten. Kremperheid harr wedderrum in dat Johr 1956 mit dat Amt Neenbrook fusioneert. 1970 dehn sik dat Amt noch mehr ut, de Gemeenden Elskop un Süderau kemen dorto.

Mit 9.294 Inwahners un en Flach vun 81,21 Quadratkilometers höört dat Amt to een vun de lütteren in den Kreis Steenborg. Dat hett ok blots dree Gemeenden mit mehr as dusend Inwahners, vun wegen de Struktur op’t Land. Dat sünd de Stand Kremp (2.357) un de Gemeenden Kremperheid (2.314) un Dägeling (1.039).

Dat Amt is in en Deel vun de Krempermasch, de twüschen Stöör un Krückau liggt. De Masch hett man in’t 13. Johrhunnert dröög leggt un denn wedder besiedelt. So harrn de Dörper Borsfleth, Elskop, Grevenkop, Kiewittsreeg, Krempdörp,  Neenbrook un Süderau bet 1892 besünner Rechten un dorven sik sülven verwalten. Ok dat Naturschutzrebeet Binnendünen Nordoe liggt to’n Deel in‘t Amt.

Mit Kremp un Kremperheid sünd twee Dörper in’t Amt an de Maschbahn vun Elmshorn na Westerland (Sylt) anslaten. Dormit sünd se ok an den Feernverkehr anbunnen. Dat is besünners wichtig, denn vele Pendlers leevt in dat Amt Kremperheid. De Weertschop in’t Amt hett veel Landweertschop un lütte un middelgrote Bedrieven. So is dat ok mehrstendeels in den helen Kreis Steenborg.

Text: J.F.

Överdragen in't Plattdüütsche: M.E.