De Schleswig-Holsteinische Tageszeitung keem toeerst an’n 02. Januor 1929 rut un weer dat eerste regionale natschonaalsotschalistsche Daagblatt vun dat Düütsche Riek. Dat keem in Itzhoe rut – un dor seet ok de Redakschoon. Dat Gebüüd vun de Redakschoon weer in de Brede Straat 40.

Hinrich Lohse (1896-1964) grünn dat Blatt. He wull dormit jeedeen Dag dorför sorgen, dat de Sicht op de Welt vun de Nazis in dat Volk rinkeem. Lohse stamm ut Möhlenbarbeek un weer Natschonaalsotschalist vun de eerste Stünn: Vun 1925 bet 1945 weer he NSDAP-Gauleider för Sleswig-Holsteen, af 1941 denn ok noch Riekskommissoor för dat Oostland un dormit een vun de Lüüd, de bi den Holocaust de gröttste Rull speelt hebbt.

De eerste Chefredakteur un de eenzige in de Redakschoon, de wat vun Journalismus verstünn, weer Bodo Uhse (1904-1963). Uhse un Lohse kregen bald Striet, denn Uhse harr mehr de Ideen vun Anarchie un Antikapitalismus un em gefull dat, wat de Landvolkbewegen wull. In’n Juli 1930 smeet man Uhse rut un Walther Fröbe kreeg den Posten as Chefredakteur, liekers he noch nie as Journalist arbeidt harr. Man sien Ideologie weer passlich.

De Schleswig-Holsteinische Tageszeitung keem jeedeen Dag vun Maandag bet Sünnavend rut, sünnavends weer dat en Wekenenn-Utgaav mit mehr Sieden. 1929 harrn 2.500 Lüüd dat Blatt abonneert, 1934 weren dat 14.000. De hööchste Oplaag harr man 1937 mit 22.000 Stück. Worüm dat Blatt so goot leep, leeg doran, dat de NSDAP  vun Anfang an in Sleswig-Holsteen un in den Kreis Steenborg so veel Toloop harr. Denn harr man meist keen anner Blääd, wiel dat de Nazis de Press ünner Wind harrn. Blääd un Tietschriften, de nich mit dat Regime övereen weren, hett man verbaden. De Lüüd in de lütten Städer un op’t Land, de Buern un de Middelstand weren mitünner gegen de Republik un gegen de Juden. So kemen de Hetz-Artikels vun de „Schleswig-Holsteinische Tageszeitung“ bi düsse Lüüd besünners goot an.

Text: V.V.

Överdragen in't Plattdüütsche: M.E.