Al siet 1944 kemen in Sleswig-Holsteen vele Flüchtlingen un verdreven Lüüd ut de Oostrebeten vun’t Düütsche Riek an. Bet 1948 weren ok noch üm un bi 1,2 Millionen „Displaced Persons“ – Lüüd, de sik vunwegen den Krieg butenvör vun ehren Heimatstaat opholen müssen – hen na dat Bunnsland in’n Noorden kamen. In düsse Grupp weren to’n gröttsten Deel Dwangsarbeiders un -arbeiderinnen un Lüüd, de man versleppt harr in de Tiet vun dat NS-Regime. Se kemen meist all ut de Staaten in Oosteuropa.

Den gewaltigen Stroom vun de Flüchtlingen kunn man eerst kuum regelt kriegen. So stegen de Inwahnertallen in de Städer in’t Kreisrebeet düchtig an: Kellinghusen harr 1939 4.747 Inwahners un Inwahnerinnen, 1946 denn 9.449, weer also um 100% anwussen. Keen anner Stadt in Steenborg nehm soveel Minschen op, wenn man dat mit de Inwahnertallen afglieken dee. De Stadt Kremp (Krempe) nehm bet 1946 1.540 Flüchtlingen op un harr dorüm 95 % mehr Lüüd as noch vör dat Enn vun’n Krieg. Man nich blots de Städer harrn mit den gewaltigen Andrang vun Flüchtlingen to doon. Ok in de Landgemeenden weren 100 % mehr Lüüd nich de Utnahm, sünnern dat weer de Regel.

Dat geev nich noog Wahnruum, dorüm bröch man de Minschen, de flücht weren, to’n gröttsten Deel in Privatwahnungen ünner. Man vele Hüüs in’t Kreisrebeet weren nich op de Reeg oder ganz twei, so weer dat nich eenfach mit dat Ünnerbringen. Man müss Flüchtlingen un Lüüd ut den Kreis dwingen, tosamen to leven – dat güng nich ümmer ahn Striet af.

De Flüchtlingen kemen in den Kreis Steenborg ahn Versorgen un ahn Heimat an. Dat Versorgen mit Levensmiddel in den Kreis, wo nu veel to veel Minschen leven, weer wichtiger as de Integratschoon vun de Flüchtlingen. Dor kümmer man sik eerst in de 1950er Johren um. En Bispill, wat Indruck maakt, is de Itzhoer Stadtdeel Tegelhörn. Hier kemen na 1945 en grote Tall vun Flüchtlingen ut de Oostrebeten hen un wahnen hier. So nööm man denn in de 1950er Johren all Straten in den Westdeel vun düt Rebeet na Städer ut den Oosten vun Düütschland. De Königsberger Allee, dorbi dach man an de Region Oostpreußen, de Danziger Straat, na de Region Westpreußen, de Stettiner Straat na de Region Pommern, ok de Breslauer Straat na de Region Slesien un denn noch de Gablonzer Weg na de Region Sudentenland.

Text: K.B.

Överdragen in't Plattdüütsche: M.E.