För de Allieerten weer na den Tweten Weltkrieg dat Entnazifizeren en wichtige Saak. In de düütsche Sellschop schull de Politik vun binnen her wedder rein warrn, so müssen Lüüd ut ehr Amt in Politik, Justiz, Kultur un Wetenschop rut, wenn se belast weren. Vun de Form her belast gellen eerstmal Lüüd, de in de NS-Tiet in de NSDAP binnen weren oder ok in en anner NS-Organisatschoon as de Stormafdelen (SA), de Schutzstaffel (SS) oder de Hitler-Jugend (HJ). Dat geev Fraagbagens, wo en Deel vun de düütsche Sellschop ehr Inbringen un ehr Verbinnen na dat NS-Regime angeven müss. Man de Verfohrens bi dat Entnazifizeren in de britsche Zoon kemen ümmer mehr vöran. So güng dat bald nich mehr blots dorüm, wat man in de Partei weer. De britschen un later ok de düütschen Utschüssen rundüm dat Entnazifizeren befragen denn Tügen dorto.

In’n Kreis Steenborg hebbt de britschen Militärs eerstmal en grote Tall an Börgermeisters, de belast weren, foorts na dat Enn vun den Krieg ut ehr Amt rutsett. So ok Kurt Petersen, NSDAP-Maat un siet 1940 Itzhoer Börgermeister. Helmuth Delbrück löös em af, dorna keem Carl-Christian Arfsten, den de Raatsversammeln as Börgermeister wählen dee. Ok in en grote Tall vun Landgemeenden kregen de Börgermeisters al in Juni 1945 Bescheed, dat se nich mehr in ehr Amt blieven kunnen. Das passeer to’n Bispill in Hennstedt, Lockstedt, Beidenfleth, Mehlbek un Oldendörp (Oldendorf).

An den Övergang 1945 na 1946 kregen de Düütschen denn de Verantwoorden för dat Entnazifizeren. De Utschüssen versöchen twüschen düsse Gruppen to ünnerscheden: Lüüd mit grote Schuld, belaste Lüüd, minner belaste Lüüd, Mitlöpers oder Lüüd, de entlast weren. In’n Ganzen hett man dorbi 406.317 Sleswig-Holsteeners indeelt. Blots 2.217 Lüüd kemen in de Kategorie vun de Belasten. Se kregen Geldstrafen, müssen ut ehr Amt rut oder kregen weniger Pangschoon. De annern Lüüd kregen de Kategorie Mitlöpers (66.500), Entlaste (206.000) oder se weren buten vör (131.600).

Besünners in Sleswig-Holsteen kregen dat vele Lüüd ut Politik, Justiz, Verwalten, Polizei un Wetenschop hen, bi ehr Karrieren na 1945 wieder to maken. In Itzhoe hett man to’n Bispill 42 Lüüd wegen ehr NS-Belasten ut den Staatsdeenst rutsett. Bet 1955 hett man blots bi fief vun düsse Lüüd nich wedder goot maakt.

Ok Peter Matthiessen, de later Landraat vun Steenborg weer, kunn in de junge Bunnsrepublik direkt wedder an sien Karrier in de Verwalten ansluten. Vör den Krieg weer Matthiessen toeerst Referendor bi de Rebeetsregeren in Sleswig un dorna arbeidt he in dat Landraatsamt in Eckernföör. Vun 1941 bet 1944 deen he in de Zivilverwalten vun de Oostrebeten, de man besett harr. Dat weer ünner Hinrich Lohse bi dat so nöömte Riekskommissariat Oostland. Hier maak he sik en Naam, eerst as persönlichen Referent vun Theodor Fründt – de weer Stellvertreder vun’t Riekskommissariat – denn as Beopdragte för de Stadt Libau. 1943 teken man em mit dat Kriegsverdeenstkrüüz II. Klass ut. In’n Mai 1945 keem Matthiessen in russ’sche Kriegesgefangenschop, 1954 keem he na Sleswig-Holsteen torüch, man wähl em noch in’n Februor vun datsülvige Johr as Landraat vun den Kreis Steenborg. Vunwegen sien lange Tiet in Gefangenschop müss Matthiessen nich dör dat Entnazifizeren hendör. Över de verleden Tieden un över sien Insetten för dat NS-Regime snack man na buten hen nich. Bet 1972 weer he Landraat in’n Kreis Steenborg, vun 1967 bet 1975 seet he för de sleswig-holsteensche CDU in’n Landdag. He kunn in Politik un Verwalten direkt so wiedermaken as vör den Krieg – un dat weer bi vele annern Lüüd in’t Land jüst so.

Text: K.B.

Överdragen in't Plattdüütsche: M.E.