De öllste Profanbo vun de Stadt Itzhoe liggt butenvör vun de ole Mitt vun de Stadt, dor, wo mal de Stöörsleuf weer. Dorüm hett dat Huus bi den Däänsch-Sweedschen Krieg vun 1657 ok nix afkregen un is nich twei gahn. Dat Gebüüd kennt man vundaag as Prinzeßhoff un in de Geschicht geev dat veel Wessel.

In de 1560er Johren bo man dat Huus mit twee Stockwarken op dat Land, wat to dat Klooster Itzhoe hören dee. De domalige Kloosterverbidder, Benedikt Pogwisch von Maßleben (üm 1510-1582) maak de Rechtsgeschäften för de Äbtissin. He kreeg den Prinzeßhoff as Lehen. Noch mehr Amtmannen un Kloosterverbidders wahnen dorna in dat Huus. In dat Johr 1569 trook Otto von Thienen (1514-1582) in, denn see man Thienenhoff to dat Gebüüd.

In’t 17. Johrhunnert änner Nikolaus Brüggemann (1632-1687), den dat Huus do hören dee, dat Utsehn vun Grund op: En barocke Portal as Ingang, Leddertapeten mit Gold doröver binnen in un vele anmaalte Böhns wiesen Kultur un Luxus in’t Leven vun Brüggemann. Vun dat, wat he ümboot hett, sünd dat Portal un de Biller an de Böhns noch dor – un denn noch dree Bookstaven ut smeden Iesen vörn an dat Huus: „N-B-M“ bedüüdt afkört „NiklolausBrüggeMann“. De Johrstall 1744 achtern an dat Huus kümmt sachts vun Rochus Friedrich Graf zu Lynar, he weer Amtmann vun Steenborg. Wohrschienlich leet he in dat Johr den Süüdflögel anboen. De Noordflögel keem 1753 mit dat hoge Pannendack dorto. Dat hett Baron Christian August von Görtz (storven 1780) maken laten.

För en korte Tiet weer de Prinzeßhoff de Sitt vun den Kurförsten Wilhelm I. von Hessen-Kassel (1743-1821). De flücht vör Napoleon I. un leev denn mit sien Leevste un de Kinner vun de beiden vun 1807 bet 1808 in Itzhoe.

Nadem dat Itzhoer Klooster das Gebüüd torüchköfft harr, weer dat de Wahnsitt för dree Äbtissinnen naenanner: Juliane zu Hessen-Kassel (Äbtissin 1810-1860), Louise zu Schleswig-Holstein-Glücksburg (1860-1894) un Marie von Schleswig-Holstein-Sonderburg-Glückstadt (1894-941). As Daams ut den Adel deen se veel Godes in de Stadt – un se geven dat Gebüüd den Naam, den dat bet vundaag hen hett.

In dat Johr 1958 övernehm de Stadt Itzhoe den Prinzeßhoff. Siet de 1960 Johren harr man dat Kreismuseum in en poor Rüüms ünnerbröcht. Nadem dat Huus heel un deel renoveert weer, maak dat an’n 11. November 1988 as Kreismuseum Prinzeßhoff de Dören op. In’n Keller geev dat nu en Lokal.

Text:M.H.

Överdragen in't Plattdüütsche: M.E.