De Festung Kremp tell jüst so as Rendsborg (Rendsburg) un later Glückstadt to de Landsfestungen vun de Hartogdömer Sleswig un Holsteen. En eerste Tiet vun den Utbo fallt in de Johren 1533/38 bet 1560, en twete twüschen 1579 un 1584. 1594 bet 1604 pass man de Festung an dat an, wat dat Militär domals bruken dee. Christian IV. sorg dorför, he weer togliek Hartog vun Sleswig un Holsteen.

As den Kaiser sien Truppen in Holsteen infullen, weer man bang, dat 1628 de Festung inslaten woor. De böverste Mann, de dat Seggen harr över Kremp, Jürgen von Ahlefeld, leet de Karken in de Neegde, Süderau un Nienbrook (Neuenbrook) daalbrennen, dat de Fiend sik nich verschanzen kunn. Man doch kregen de Kaiserlichen dat hen, de Festung aftosnieden, dat geev keen Levensmiddel ut Glückstadt mehr.

Över dat Belagern vun Kremp (Krempe) un Glückstadt 1628 geevt verscheden Quellen Utkumst. Domals schätz de General vun’n Kaiser, Gottfried Heinrich Graf zu Pappenheim – man kennt em bet vundaag in en Spreekwoort – de Festungsanlagen in. Un dorto hett man ok noch twee Militärkoorten ut datsülvige Johr.

Dat klapp nich, ut de Festung ruttokamen oder Proviant to bringen. Man ok för de, de belagern deen, weer dat Versorgen swoor. In’n Oktober keem Wallenstein un man dorv kapituleren. An’n 14. November dorven de Besetters de Festung verlaten un na Glückstadt trecken. Blots dree Daag later keem en Stormfloot un översweem dat Lager vun’n Kaiser. Man brook dat Belagern vun Glückstadt af. 

Vun den Torstensonkrieg vun 1643 bet 1645 weer Kremp nich direkt militäärsch drapen. De Festung woor nich direkt belagert. De böverste Mann, de dor dat Seggen harr, weer nu Georg Rhowedder. Vun dor ut hett man aver militäärsch opereert gegen de Sweden ünner annern in Scheenfeld (Schenefeld) un Itzhoe (Itzehoe).

Text: F.Z.

Överdragen in't Plattdüütsche: M.E.