Wenzel August Dominik Hablik woor an‘n 04.08.1881 in‘t böhmsche Brüx as Söhn vun en Dischermeister boren. Nadem he in verscheden Handwarken arbeidt harr, besöch he de Fackschool för Keramik un verwandtes Kunstgewarf in Teplitz-Schönau, wessel denn 1902 mit en Stipendium an de Kunstgewarfschool vun dat Öösterrieksche Museum för Kunst un Gewarv in Wien und bröch sien Studium vun 1905 bet 1907 an de Akademie vun de Künst in Prag toenn.

Na Sleswig-Holsteen keem Hablik 1907, as em de Kunstkritiker Ferdinand Avenarius inlaadt harr, för en Tietlang op Sylt to arbeiden. Op den Weg torüch dreep Hablik op Helgoland den Holtkoopmann Richard Biel ut Itzhoe (Itzehoe). De besorg em Opdrääg un stütt em as sien Mäzen. Un denn siedel sik Hablik in Itzhoe an, wo he ok Elisabeth Lindemann ut Westerwohld kennenlehr. För ehr Handweevwarksteed teken he Plaans, un 1917 schull he ehr heiraden. In Itzhoe leev un arbeidt dat Poor tosamen in en Huus in de Talstraat 14, wat se nee inrichten deen.

1916 woor he Maat vun den „Werkbund“ un vun den „Berliner Arbeitsrat für Kunst“, 1920 woor he düütsche Staatsbörger un 1919 Maat vun de Grupp „Die gläserne Kette“. De Künstler streev na dat Ideal vun en Gesamtkunstwark un en Kunst för all Minschen. Besünners utteken doot em sien Plaans över Architektur un Middel to’n Bewegen un sien praktische kunsthandwarkliche Arbeit, düsse besünners för de Warksteed vun sien Fru. Dor, wo he studeert hett, hett de „Jugendstil“ Inwark op sien Kunst. 

1932 woor Hablik wegen en Kreevswulst opereert un verloor denn dat rechte Oog. He storv an’n 23.03.1934 in Itzhoe.

Text: A.S.

Överdragen in't Plattdüütsche: M.E.