In Westerwohld in Süderdithmarschen woor Abeline Elisabeth Lindemann an‘n 23.08.1879 in en Buernfamilie rinboren. Se keem al in ehr Heimat in Kuntakt mit dat Weverhandwark, wat al do knapp noch lohnen dee. Na en Utbillen as Musterteknerin an en Tekenschool in Dresden arbeidt se eerstmal weg vun de Heimat. Denn maak se dorto noch en Utbillen as Weverin an de Weevschool Handarbetets vänner in Stockholm ünner Agnes Branting. Dorna keem se torüch na Süderdithmarschen un grünn dor mit Stütt vun den Kreis in dat Johr 1902 de Meldörper Museumsweverie.

Nadem se al in Meldörp (Meldorf) Weverie un School sülfstännig leit harr, verlegg se den Bedriev 1917 na Itzhoe (Itzehoe), wo he in Tosamenarbeit mit den Künstler Wenzel Hablik als Handweverie Hablik-Lindemann wiederföhrt woor. In datselbe Johr heiraden Elisabeth Lindemann un Wenzel Hablik denn.

Se sloot sik 1912 an den „Deutschen Werkbund“ an, ehr Streven weer: Se wull de traditschonellen Techniken vun dat Weverhandwark bruken un in en Tiet mit niege Anspröök industrielle Woren wieder konstrueren. De Tosamenarbeit mit ehren Ehmann wiest, dat Kunst un Handwark mitenanner veel Nieges produzeren kunnen. Ehr Arbeit woor ümmer wedder bi Messen vörstellt, op de ganze Welt kreeg man dorvun to weten. Se schaff dat, veel to exporteren.

Neven ehr Arbeit födder Elisabeth Hablik-Lindemann aktiv dat Kulturleven in ehr Heimat. In ehr Huus funnen Kunzerten statt, se geev dat Heimatmuseum vun’n Kreis Steenborg en Tohuus un grünn den Kulturring Itzhoe mit. Se gellt as de „Mudder vun de Handweverie“, na ehr is de Gollen Ehrenring vun de Handwevers nöömt, de Elisabeth-Hablik-Lindemann-Ring.

Se storv an‘n 15.08.1960 in Itzhoe.

Text: A.S.

Överdragen in't Plattdüütsche: M.E.