Hanns Radau woor as Johannes Conrad Radau an‘n 24.03.1901 in‘t oostpreußsche Teistimmen boren. Nadem he de Pröven an’n Lehrerseminoor vun Braunsberg bestahn harr, kreeg he keen Anstellen in den Beroop un sloog sik in de Heimat un ok in’t Rheinland mit anner Arbeiden dör. Eerst af 1922 weer he an verscheden Steden Volksschoollehrer. Nadem man em ut de Kriegsfangenschop in Sleswig-Holsteen rutlaten harr, keem he 1946 as Lehrer na Itzhoe (Itzehoe) an de Delftor-School, wo he ok Konrekter woor.

Ok al sien Mudder Maria harr schreven, wat den jungen Radau fröh motiveren dee, dat ok in düt Metier to versöken. Enkelte fröhe Schriften hett he ok rutbröcht. Eerst af 1945 füng he in Itzhoe richtig mit dat Schrieven an. He schreev Gedichten op Hoochdüütsch un ok in oostpreußsche Platt, Romans, Vertellen, Schauspelen, Dreihböker för Films un Höörspillen. De senn man bi den Bayerischen Rundfunk un bi Radio Wien. An’n mehrsten opmarksam woorn de Lüüd bi sien acht Böker för junge Lüüd. De schreev he, wiel dat he untofreden weer mit den Inhoolt vun de Böker, de dat geev. Man översett vele Böker vun em, so as Großer Jäger Little Fox (1957) oder Im Banne des Amazonas (1960). Sien Oort vun’t Schrieven weer realistisch, dorto keem an vele Steden Satire.

As Holtbildhauer weer he meist noch bekannter as dör sien Schrieven. He füng 1937 as Holtsnittjer an, in Itzhoe maak he Holtplastiken, de later ümmer abstrakter worrn sünd. He weer op Utstellens wiet rut över Sleswig-Holsteen, in ganz Düütschland, in de Swiez un in Däänmark dorbi.

In’t Öller vun 59 Johr storv Hanns Radau an‘n 18.12.1960 in Itzhoe.

Text: A.S.

Överdragen in't Plattdüütsche: M.E.