As man an‘n 28. Oktober 1945 den Künstlerbund Steenborg in Itzhoe grünnt hett, weer de Twete Weltkrieg eerst siet korte Tiet vörbi. De Lüüd harrn to wenig Levensmiddel un dat weer swoor, Materiol för de Kunst to kriegen. Un doch wagen üm un bi 20 Künstler un Künstlerinnen en niegen Anfang un sloten sik tosamen as en Gemeenschop mit desülvigen Intressen. Ünner de Maten vun de eerste Stünn weren ünner annern Ingeborg Blankenstein, Paul Holtorf, Matthias Jarren, Walter Koll, Herbert Ritter von Krumhaar, Helene Lübbers-Wegemann, Hanns Radau un Otto Warnke.

De Bildhauerin Ingeborg Blankenstein harr sik en Naam maakt as Porträtkünstlerin. En poor vun ehr Biller vun bekannte Lüüd so as den nedderdüütschen Schrieversmann Johann Hinrich Fehrs sünd vundaag in’t Kreismuseum Prinzeßhoff.

Paul Holtorf, Matthias Jarren, Herbert Ritter von Krumhaar un Otto Warnke illustreren mit veel Indruck Landschoppen un Gebüden in’n Kreis Steenborg. Nich all Maten weren blots Künstlers: Matthias Jarren arbeidt as Malermeister in Itzhoe un maal in sien Frietiet. En grote Tall vun Ansichten mit Landschoppen, de he maalt hett, gifft dat vundaag noch.

Kort nadem man den Steenburger Künstlerbund grünnt harr, steeg de Tall vun de Maten gau op 50 Lüüd an. Man snack dorvun, dat Künstler un Künstlerinnen mehr Levensmiddelmarken kriegen kunnen. Doch as man dat överpröövt harr, bleven de Künstlerlüüd wedder ünner sik un bruken den so nöömten Malerböhn in de Beroopsschool Itzhoe (Grote Paaschborg) bet 1980 as Steed för Drepen un Utstellen. Siet 1981 köönt de Maten in dat Kunsthuus in de Reichenstraat (vundaag Wenzel-Hablik-Museum) utstellen.

 Vundaag is de Künstlerbund Steenborg de öllste aktive Künstlerverenigung in Sleswig-Holsteen siet den Tweten Weltkrieg. Künstler un Künstlerinnen as de Realist Friedel Anderson, de Bildhauer Fritz Arnold Kunkelmoor un de Malerin Silke Schröder höört to den Bund dorto un geevt em sien besünner Gesicht vun de Kunst.

Text: M.H.

Överdragen in't Plattdüütsche: M.E.