Den Grundsteen för dat Druck- un Verlagshuus Gruner + Jahr AG & Co legg 1879 Otto Gruner sen. in‘t Öller vun 29 Johr in Köln-Ehrenfeld. He köff en Filiaal vun en Papeergroothannel. Eerstmal heeß de Bedriev Gruner & Keiser. Sien öllsten Söhn Otto Gruner jr. keem 1891 mit in de Firma rin. Af 1914, nadem de Deelhebber Keiser utstegen weer, heeß de Firma Gruner und Sohn. In de Johren na den Eersten Weltkrieg, as de Weertschop dat swoor harr un nadem de Firmengrünner Otto Gruner 1917 storven weer, övernehmen de Bröder Otto un Richard Gruner sen. dat Ünnernehmen. Op eenmal storv denn de Broder Otto, denn güng Richard 1923 mit den Bedriev na Noorddüütschland. He versprook sik in de Neegde vun de Welthannelsstadt Hamborg grötter Chancen för den Hannel mit technische Maatpaperen. In Itzehoe Sude füng 1924 de Fabrikatschoon in de Gebüden vun de ole Hafermöhl an. Man bo de Fabrikatschoon mehr un mehr ut, so müss man gau den Bedriev grötter maken. In de Klaus-Groth Straat funn man en nieges Grundstück.

Na dat Enn vun den Krieg bo Richard Gruner sen. un noch acht Mitarbeiders den Bedriev in korte Tiet wedder op. 1946 storv Richard Gruner sen. bi en Autounfall, un sien Söhn, Richard Gruner jr. (1925-2010), övernehm den Bedriev. Ünner dat Leid vun den niegen Inhebber investeer dat Ünnernehmen in den Deepdruck. Mit den kunn man goot de Tietschriften herstellen. De Rundfunk-Tietschrift Hör Zu! weer de eerste grote Kunn, in’t Johr 1949 keem de Verdrag mit den Stern achterna.

Man sloot noch mehr Verdrääg mit bekannte Tietschriften af, un so kunn de Bedriev vun Johr zu Johr grötter warrn. Dat Ünnernehmen trock op en nieges Bedrievsrebeet Am Vossbarg, dat leeg direkt an de Stöör. För en Tiet weer Gruner Druck mit sien över 2.500 Arbeitslüüd de gröttste Deepdruckbedriev vun de Welt. Dat man gegen de Konkurrenz op den Markt vun de Druckwarken beter gegenan kunn, sloten sik in dat Johr 1965 de Verleggers John Jahr un Dr. Gerd Bucerius mit Richard Gruner to dat Druck- un Verlagshuus Gruner + Jahr tosamen. Man blots veer Johr later güng dat utenanner mit de dree Firmeninhebbers. Richard Gruner steeg ut un verköff sien Andelen an de Bertelsmann AG in Gütersloh. In dat Johr 2005 övernehm Prinovis dat Ünnernehmen in Itzhoe – Bertelsmann, Gruner + Jahr un Axel Springer harrn düt Deepdruck-Joint-Venture grünnt. 2013 maak dat denn ganz de Dören dicht.

Text: S.P.

Överdragen in't Plattdüütsche: M.E.