In den Kreis Steenborg, in den dat bet hen na dat 19. Johrhunnert veel Landweertschop geev, kunnen sik denn mehr un mehr Gewarvbedrieven vun Bedüden ansiedeln. De Alsen’sche Portland-Cement-Fabrik in Itzhoe un Lägerdörp un ok de verscheden Fayencemanufakturen in Kellinghusen hören dorto. Wenn man op de Laag vun de Weertschop an’t Enn vun dat Kaiserriek kieken deit, süht man de velen verscheden Ünnernehmens:

Dat geev de Farverie Junge in Kellinghusen, de Kremper Ledderwarken Henry Hallenstein & Co., de Spinnerie Ottens & Co. in Horst un de Firma Peter Temming in Glückstadt (vundaag Steinbeis Papier), de Boomwull bleken dee. Un denn harr Itzhoe ünner annern dree Nettfabriken: De „Mechanische Netzfabrik und Weberei AG“ (Inefa), de „Norddeutsche Netzwerke GmbH“ un noch de „Hochseenetzwerke AG“. Dorto kemen de Tapetenfabrik Heesch & Co., de Kistenfabrik Biel un in de Levensmiddelindustrie eenmal de Zuckerraffinerie de Vos un denn noch de Kaffeeersatzfabrik C. C. v. Holstein. In Sankt Margarethen grünnen 1920 twee Ingenieuren den Pumpenbedriev Siemen un Hinsch (SIHI), den man 1925 na Itzhoe verlegg un de mit sien besünner Extradelen internatschonal togang is. De „Vereinigten Thorner Leb- und Honigkuchenwerke Gustav Weese-Richard Thomas“ kemen ok noch in de Kreisstadt. De Bössenmakerfirma Schmidt (LoLa-Bürsten) stamm vun fröher her ut Kremp un siedel denn na Lockstedter Lager (Hohenlockstedt) över. Hier produzeren na den Tweten Weltkrieg ok de Keramikmanufaktur Kupfermühle (KMK) un de Firma Nier (Füerhand-Stormlaternen). En wichtige Steed för de Industrie is vundaag Dägeling. Dor gifft dat en Reeg vun grote Bedrieven, de ehr Wuddeln in Steenborg hebbt: Meifort (Landtechnik; in Wilster grünnt un af 1875 in Sude/Itzhoe), Rekord (Finstern un Dören; ut Neenkarken/Bahrenfleth) un Trivium (Blickdosen för Levensmiddel; kemen vun de Metallfabrik Wessel in Itzhoe).

Text: J.O.

Överdragen in't Plattdüütsche: M.E.