De Fayencetechnik kümmt vun fröher her in’t 9. Johrhunnert n. Chr. ut Mesopotamien un keem op, üm dat kostbore Porzellan natomaken. Över verscheden Hannelswegen in Ägypten un Spanien keem dat Handwark eeerstmal na Italien. Vun hier stammt ok de Naam Fayence, vun de italiensche Stadt Faenza. In den Loop vun dat 18. Johrhunnert kemen en ganze Reeg vun Fayencemanufakturen in Sleswig-Holsteen op. De Technik, woans man Fayencen maken dee, bröch de Fayencemaler un -modellerer Sebastian Heinrich Kirch (*1711-†1768) 1763 na Kellinghusen. De lütte Oort pass goot för de Produkschoon vun Keramik: Dat geev en Barg allerbesten Toon un dichten Ekenwoold för dat Brennen. So woor Kellinghusen en gode Steed dorför. Un denn leeg de Oort direkt an de Stöör.

An’n 13. 07.1764 grünn man de eerste Kellinghusener Manufaktur. In dat Johr dorna geev de däänsche König dat Privileg dorto. Em gefullen de Smuck- un Bruuksdelen ut de Kellinghusener Fayencefabriken op’t Best. Twüschen 1764 un 1860 siedeln sik söss Fayence-Manufakturen in Kellinghusen an. Dat Keramikhandwark drück dormit düssen Oort den Stempel op as keen anneres. Beröhmt sünd Kellinghusens Fayencen besünners dör de Tellers mit den Blomensmuck an’n Rand un dat lüchten Geel dorto. Al na en ganz poor Johrteihnten müssen de mehrsten sleswig-holsteenschen Fayencemanufakturen sluten. An’t Enn vun dat 18. Johrhunnert woor dat Porzellan billiger un dat nich so düre engelsche Steengoot keem op den Markt. Dat weer dat Enn för de Manufakturen, blots de in Kellinghusen kunnen sik an dat Niege anpassen. Se kunnen länger produzeren, denn se graven den Toon ut den Törf direkt bi sik ut. Noch bet 1860 stellen de Kellinghusener Bedrieven för de Buern mit Geld Pött un Fliesen her. Man op Duer kunnen de Handwarks-Fayencen nich gegen dat engelsche Steengoot an. Dat stell man industriell her, de Konkurrenz weer to groot. Vun 1960 bet hen na de Mitt vun de 1990er Johren geev dat de Warksteed Kellinghusener Fayencen und Keramik von der Trenck. Wilhelm Freiherr von der Trenck un sien Ehfro Ingeburg maken de ole Traditschoon wedder lebennig un stellen de Warkstücken her, de domals mit den lüchten gelen Rand op de ganze Welt beröhmt weren.

Text: S.P.

Överdragen in't Plattdüütsche: M.E.