De Slotten un Herrenhüüs höört seker mit to de bekanntsten Tüügnissen vun de Profanarchitektur in de fröhe Neetiet in Sleswig-Holsteen. De mehrsten vun düsse Anlagen sünd op de oosten Siet vun dat Bunnsland. Man ok in’n Kreis Steenborg finnt man en poor enkelten Bispillen. Dat Slott Bredenborg (Breitenburg) in de Gemeende mit densülvigen Naam hett man in’t 16. Johrhunnert boot, de Adelsmann Johann Rantzau geev den Opdrag dorto. Jüst so as de mehrsten annern Slotten un Herrenhüüs in’n Kreis deen dat as Middelpunkt vun de Verwalten för de Adels-Landgöder. De Bo wiest op Biller ut de domalige Tiet, dat man noch veel Borgen ut dat Middelöller namaakt hett. So hett dat fröhe Herrenhuus noch Watergroven un Palisadenwallen, üm dat fast to maken. Man bo dat mehrmals üm, nu gifft dat noch wenig, wat an den olen Bo torüchdenken lett. Bet vundaag hen höört dat Slott de Familie Rantzau. Ok in Mehlbek un Draag (Drage) bo man in düsse Tiet Herrenhüüs, de as en Festung weren. Mehlbek reet man 1817 af, denn keem dor en lütter Wahnhuus hen, dat to de Tiet pass un dat noch vundaag dor steiht. Överall in’n Kreis is to sehn, dat man de Gebüden ümmer wedder ümboot, tweimaakt un wedder opboot hett, so ok in Krummendiek, Sarlhusen oder Heiligenstedten. De hett man in’t 18. un 19. Johrhunnert utwesselt gegen niege Hüüs. En besünnern Fall weer in Draag. Dat Slott verköff man 1728 an den däänschen König, nadem dat vörher verscheden Lüüd tohöört harr. De König geev dat wieder an sien Stattholer in Holsteen. Bet 1745 leet de dat utboen, denn weer dat dat gröttste Barockslott in’n Westen vun Holsteen – mit Park, Riedbahn un Fasanerie. Blots en poor Johrteihnten later reet man dat Slott gegen Enn vun dat Johrhunnert meist vullstännig wedder af. Meist so güng dat mit dat eenzig Königsslott in’t Kreisrebeet. Af 1629 leet de däänsche König un Stadtgrünner Christian IV. en Slott na de Oort vun de Noordsche Renaissance boen. Dat müss al 1708 wedder afreten warrn, dat weer nich stabil un güng al wedder twei. Vundaag gifft dat noch dat Provianthuus dicht bi den Haven, dat 1705 fardig weer un noch an dat Slott denken lett.

Text: H.A.

Överdragen in't Plattdüütsche: M.E.