In‘t Königriek Däänmark hett man 1665 mit de Lex Regia den Absolutismus inföhrt. Däänmark harr denn en Arvmonarchie, un schull de Linie vun de Mannslüüd utstarven, so kunn ok en Fru den Thron arven. In den Börgerkrieg vun 1848 hett man sik doröver streden, wat dat ok in de Hartogdömer Sleswig un Holsteen so maakt warrn schull.

Christian IV. grünn 1617 de Festungsstadt Glückstadt an de Elv – do weer dat „Königsgesetz“ noch wiet weg, man Glückstadt wuss in en poor Johr ran un weer denn een vun de gröttsten Städer vun’t däänsche Königsriek. Al 1631 bo man en Palais in de Stadt, dat düchtig wat vörwiesen kunn. Dor resideer Graf Christian Pentz, Swiegersöhn vun den König un Gouverneur vun de Festung. 1695 bo man Holtbalkendeken mit rieken Smuck in. In’n Loop vun dat 18. Johrhunnert hett man dat Palais en poormal moderner maakt. Vun 1802 bet 1877 resideer de Familie Brockdorff in Glückstadt un geev dat Palais den Naam. Vundaag is dat Detlefsen-Museum in dat Huus ünnerbröcht.

Glückstadt harr al an den Anfang vun dat 17. Johrhunnert en königlich privilegeerte Stadtaftheek – un denn noch de Slottaftheek. Dat weer för en Stadt vun ehr Grött wat Besünners, wies aver de Bedüden as afslutistsche Residenz. De egentliche Blöhtiet vun de Stadt weer mit den Dood vun Christian IV. 1648 to Enn, man Glückstadt harr liekers en strateegsch Bedüden för den däänschen ganzen Staat: 1649 verlegg man de Regerens- un Justizkanzlie för den Königlichen Andeel vun de Hartogdömer vun Flensborg hierhen. De Kanzlie weer eerst een Johr vörher grünnt woorn.

 Af 1713 weer de Kanzlie noch för den holsteenschen Andeel tostännig. Man harr aver wiederhen düchtig Verbinnen mit Kopenhagen un mit dat Hillige Röömsche Riek. In Itzhoe seet vun 1835-1846 un wedder vun 1853-1863 de Holsteensche Stännversammeln tosamen. De weer as Berader bi dat Verfohren um niege Gesetten mit inbunnen.

Dat Museum Kellinghusen wiest op de Bedüden vun den Oort as en vörindustrielle Zentrum mit söss Fayence-Maufakturen twüschen 1765 un 1860 hen. In’t Slott Bredenborg maakt de staatsche Sammeln an eerste Afformen vun Originalen vun den däänschen Bildhauer Bertel Thorvaldsen (1770-1844) Indruck – un dat Detlefsen-Museum wiest de Geschicht vun Glückstadt mit all ehr Facetten.

Text: C.W.

Överdragen in't Plattdüütsche: M.E.